डिग्री सञ्चालनका लागि पुराण

Image

Spread the love
  •  
  •  
  •  
  •  
  •  

प्रयास लिम्बू
ताप्लेजुङ, २४ माघ । ताप्लेजुङस्थित पाथीभरा बहुमुखी क्याम्पसमा स्नातकोत्तर (मास्टर डिग्री) सञ्चालनका लागि बुधबारदेखि ज्ञान महायज्ञ सुरु गरिएको छ । क्याम्पसको आफ्नै आर्थिक स्रोतबाट स्नातकोत्तर तहको पढाई सुरु गर्न असम्भव भएपछि जिल्लाकै पूरानो पाथीभरा बहुमुखी क्याम्पसले सप्ताह ज्ञान महायज्ञ लगाएको हो ।
स्नातकोत्तर तहको पढाई सुरु गर्नका लागि आर्थिक सङ्कलन गर्ने योजनाका साथ महायज्ञको आयोजना गरिएको क्याम्पस सञ्चालक समितिका अध्यक्ष गजेन्द्र तुम्याहाङ्ले जानकारी दिए । स्नातकोत्तर तहको पढाई सञ्चालन गर्न र सो तह सञ्चालन गर्नलाई आवश्यक पर्ने भौतिक पूर्वाधारको व्यवस्थापन गर्न क्याम्पससँग स्रोत नभएपछि आर्थिक सङ्कलनलाई नै प्राथामिकतामा राखेर ज्ञान महायज्ञको आयोजना गरिएको तुम्याहाङले बताए ।
त्रिभुवन विश्व बिद्यालययबाट सम्वन्धन प्राप्त निजी तहको यस क्याम्पसमा हाल मानविकी तथा व्यवस्थापन संकायमा स्नातक तहसम्मको पढाइ हँुदै आएको छ । शिक्षा शास्त्र संकायमा स्नात्तकोत्तर तहको पढाई सञ्चालन गर्नका लागि क्याम्पसले आवेदन गरेको तर रकमको अभावमा थप प्रक्रिया अघि बढाउन नसकेको क्याम्पस प्रमुख मोहनकुमार राईले जानकारी दिए । राईले यसअघि देखि नै स्नातकोत्तर तहको पढाई सुरु गर्ने योजना बनाए पनि आर्थिक व्यवस्थापन गर्न नसके पछि पढाई सुरु गर्ने लक्ष्य राखेरै क्याम्पसले महायज्ञ लगाएको बताए ।

क्याम्पस प्रमुख राईका अनुसार विगत २०४७ सालमा स्थापना भएको क्याम्पसमा हाल सञ्चालित स्नातक तहकै लागि समेत भौतिक पूर्वाधारको प्रयाप्तता छैन । तह वृद्धि गर्दा अझै भौतिक पूर्वाधार साथै जनशक्तिको समेत व्यवस्थापन गर्नुपर्ने हुँदा आर्थिक जुटाउने लक्ष्यअनुसार ज्ञान महायज्ञको आयोजना गरिएको क्याम्पसले जनाएको छ । बुधबार देखि फागुन १ गते मङ्गलबारसम्म सञ्चालन हुने महायज्ञबाट चार करोड रुपियाँ आर्थिक सङ्कलन गर्ने लक्ष्य राखेको क्याम्पसले जनाएको छ ।
यता ताप्लेजुङकै शैक्षिक विकासका लागि महायज्ञ (पुराण) आयोजना गरिएकाले सबै सहयोग तथा दानदातालाई सहयोग गर्न पनि क्याम्पसले आग्रह गरेको छ । जिल्लामै स्नातकोत्तर तहको पढाइ हुने हो भने यहाँबाट अन्यत्र अध्ययन गर्न जानुपर्ने बाध्यता हट्ने भएकाले यतिबेला सबैको सहयोग आवश्यक हुने महायज्ञ सञ्चालनका लागि गठित प्रचारप्रसार उपसमितिका संयोजक सजन पौडेलले बताए । महायज्ञमार्फत सहयोग गर्ने सहयोग दातालाई क्याम्पसले उचित सम्मान गर्ने पनि पौडेलले जानकारी दिए ।
यता महायज्ञको पहिलो दिन बुधबार बिहान कलश यात्राद्वारा सदरमुकाम फुङ्लिङ बजार परिक्रममा गरिएको थियो । यात्रामा विभिन्न जातिका मानिस मौलिक भेषभूषासहित सहभागी थिए भने बजार परिक्रमा पछि कलसयात्रा क्याम्पस परिसरमा पुगेर टुङ्गिएको थियो ।

तपाईको प्रतिक्रिया

Admin
झापा  
Image
Image
Image

© 2018 Sajilokhabar.com  | Powered by DreamSYS IT Solution