ताप्लेजुङका तीन जना फरार अभियुक्त पक्राउ

Image

Spread the love
  •  
  •  
  •  
  •  
  •  

ताप्लेजुङ, १ फागुन । मानव बेचविखन तथा ओसारपसार मुद्दामा दोषी ठहर भई कैद सजाय तोकिएका ताप्लेजुङका तीन जना फरार अभियुक्तलाई प्रहरीले पक्राउ गरेको छ । उच्च अदालत विराटनगर, इलाम इजलासले दोषी ठहर गरेका दुई महिलासहित तीनजनालाई सोमबार ताप्लेजुङ प्रहरीले पक्राउ गरेको हो ।
जिल्ला प्रहरी कार्यालय ताप्लेजुङका प्रमुख प्रहरी नायव उपरीक्षक ज्ञानेन्द्रबहादुर बस्नेतका अनुसार पक्राउ पर्नेहरुमा साविक निघुरादिन ६ घर भई हाल फुङ्लिङ नगरपालिका ४ बस्ने ४८ वर्षीय दावारिन्जेन शेर्पा, साविक थुकिमा ९ घर भएकी ४५ वर्षीया मिङ्मादिकी शेर्पा र लिङ्तेप १ घर भएकी ४० वर्षीया लाक्पा शेर्पा छन् । मिङ्मादिकी र लाक्पा हाल फुनपा ४ मा नै बसोबास गर्दै आएका थिए ।
पक्राउ परेका प्रतिवादीहरु उपर २०७२ साल माघ ४ गते जिल्ला अदालत ताप्लेजुङमा मुद्दा दर्ता भएको थियो । मुद्दा दर्ता पछि जिल्ला अदालतले दावारिन्जेनलाई ४५ हजार रुपियाँ तथा मिङ्मादिकी र लाक्पालाई जनही २० हजार रुपियाँ जरिवाना गरी सफाया दिए पनि पुनः इलाम इजलासले उनीहरुलाई दोषी ठहर गर्दै २०७४ साल भदौ २६ गते एक वर्षको कैद सजाय सुनाएको हो । इलाम इजलासको फैसला पछि उनीहरु फरार रहेका थिए ।
यता तीन प्रतिवादीमध्ये एकजनाले २७ र दुईजनाले २६÷२६ दिन पहिले सजाय भुक्तान गरेकाले अब एक वर्षको कैद सजायमा उक्त अवधि छुट हुने जिल्ला अदालत ताप्लेजुङले जनाएको छ । उनीहरुलाई सोमबार नै कारागार चलान गरिएको जिल्ला प्रहरी कार्यालयले जानकारी दिएको छ ।

तपाईको प्रतिक्रिया

Admin
झापा  
Image
Image
Image

© 2018 Sajilokhabar.com  | Powered by DreamSYS IT Solution