प्राधिकरणले ३ लाख थान मिटर ल्याउने

Image

Spread the love
  •  
  •  
  •  
  •  
  •  

काठमाडौं, २ फागुन  । नेपाल विद्युत् प्राधिकरणले उपलब्ध गराउने विद्युत्को मिटर नपाएर तपाईं हैरान हुनुहुन्छ ? भने अब तपाईं चिन्ता नलिनुस् । प्राधिकरणले निकट भविष्यमा ३ लाख थान नयाँ मिटर ल्याउन लागेको छ ।

आम रुपमा मिटरको चर्को माग आएका कारण मिटर खरिद गर्नेतर्फ प्रक्रिया अगाडि बढाएको प्राधिकरणले जनाएको छ । उपभोक्ताले मागे जति मिटर उपलब्ध गराउने र चोरी नियन्त्रण गर्ने लक्ष्यका साथ मिटर खरिद गर्न लागेको प्राधिकरणले जनाएको छ ।

खरिद गर्न लागिएका ३ लाख थान मिटरमध्ये २ लाख ५० हजार थान भारतबाट ल्याउने तयारी गरिएको छ । यस्तै बाँकी रहेको ५० हजार थान मिटर भने चीनबाट आयात गरिनेछ ।

जिल्लास्थित प्राधिकरणका वितरण केन्द्र र जिल्ला कार्यालयले मिटर नभएका कारण चोरी नियन्त्रण गर्न नसकिएको, मिटरको अभावमा विद्युत् चोरको हौसला बढेको भन्दै रिपोर्ट बुझाउन थालेपछि प्राधिकरणले मिटर खरिदको योजना अगाडि सारेको हो ।

विशेष गरी तराईका बारा, पर्सा, सिराहा, सर्लाही, रौतहटलगायतका जिल्लामा कालोबजारीमा मिटर खरिद गर्नुपरेको अत्याधिक गुनासो आउने गरेको छ । राजधानीकै विभिन्न स्थानमा समेत मिटरको अभावका कारण उपभोक्ता लामो समयसम्म लाइनमा बसेर खरिद गर्नुपरेको छ ।

मिटर नै नपाएपछि अध्यारोमा बस्ने कुरा भएन, चोरेर भने पनि विद्युत् बाल्नै पर्यो, उपभोक्ताले प्राधिकरणसमक्ष यस्तै गुनासो गर्ने गरेका छन् । उपभोक्ताको गुनासो सम्बोधन गर्न पनि मिटर खरिद गर्न लागिएको हो, प्राधिकरणका कार्यकारी निर्देशक कुलमान घिसिङले भने ।

मिटर खरिद गर्न भारतीय कम्पनीसँग सम्झौता भएको प्राधिकरणले जनाएको छ । एक वर्षमा ३ लाखभन्दा बढी मिटरको माग आएपछि खरिद प्रक्रिया शुरु गरिएको प्राधिकरणले जनाएको छ । माग ३ लाखको आए पनि प्राधिकरणसँग हाल १ लाखको हाराहारीमा मात्रै मौज्दात रहेको छ । त्यसमध्ये पनि करिब २० प्रतिशत मिटर बिग्रिएका, फुटेका तथा काम नलाग्ने रहेका छन् ।

यस्तै प्राधिकरणका लागि सधैंका टाउको दुखाईको विषय बन्ने गरेको ट्रान्सफर्मर खरिदको प्रक्रियासमेत शुरु भएको जनाइएको छ ।

देशभर २१ हजार बढीको संख्यामा ट्रान्सफर्मरको माग हुने गरेको छ । तर, मागअनुसार आपूर्ति गर्न भने प्राधिकरणले सकिरहेको छैन ।

मागको ५० प्रतिशत अर्थात् १२ हजार ट्रान्सफर्मर खरिदको प्रक्रिया अगाडि बढाएको कार्यकारी निर्देशक घिसिङको भनाइ छ । देशव्यापी रुपमा विद्युत्को चर्को माग र त्यसलाई व्यवस्थापन गर्ने लक्ष्यका साथ करिब १२ हजार थान ट्रान्सफर्मर खरिद गर्ने योजना अगाडि सारेको प्राधिकरणले जनाएको हो । प्राधिकरणले खरिद गर्न लागेको ट्रान्सफर्मर १०० केभी क्षमताका रहेका छन् ।

कतिपय स्थानमा ट्रान्सफर्मरको कम क्षमताका कारण विद्युत् चुहावट हुने र भोल्टेजको समस्यासमेत उत्पन्न हुने गरेको छ । आगामी २ महिनाभित्र ट्रान्सफर्मर आयात शुरु हुनेछ ।

खरिद गर्न लागिएका ट्रान्सफर्मरमा ८ हजार थान चीनबाट र ४ हजार थान भारतबाट ल्याइने छ । त्यसका लागि १ अर्ब ५० करोड रुपैयाँ खर्च हुनेछ ।

तपाईको प्रतिक्रिया

Admin
दमक, झापा  
Image
Image
Image

© 2018 Sajilokhabar.com  | Powered by DreamSYS IT Solution