‘मेचीपारि’को स्कूलमा नयाँ भवनमा, कम्प्यूटर सिकाइने

Image

Spread the love
  •  
  •  
  •  
  •  
  •  

गंगा बराल
भद्रपुर, ९ चैत । ‘मेचीपारिको गाउँ’ले चिनिने भद्रपुर नगरपालिका वडा नं ३ स्थित आदिबासीबहुल वस्तीमा रहेको मेची आधारभूत विद्यालयले नयाँ भवन पाएको छ ।
मेची नदीले छुट्याएकै कारण विकासका सबैखाले पूर्वाधारहरुबाट लामो समयसम्म वञ्चित सो गाउँका बालबालिकालाई सुविधाजनक ढंगले शिक्षा प्रदान गर्न निर्माण गरिएको दुईकोठे भवन सञ्चालनमा ल्याइएको हो ।
बिहीबार एक समारोहका बीच नयाँ भवनको उद्घाटन गर्दै प्रमुख अतिथि भद्रपुर नगरपालिका प्रमुख जीवनकुमार श्रेष्ठले ‘मेचीपारिको गाउँ’को छुट्टै महत्व र विशेषता रहेकोले सो गाउँलाई नमूना गाउँको रुपमा विकास गर्ने योजना बनाइने उल्लेख गरे । विकासका आधारभूत सबैखाले सुविधा उपलब्ध गराई पर्यटकीय अवधारणा अनुसार विकास गरिने उनको भनाइ थियो । उनले सो गाउँमा अग्र्यानिक तरकारी खेतीको पकेट क्षेत्रको रुपमा पनि नगरपालिकाले कार्यक्रम अघि बढाइसकेको जानकारी दिए ।
२०४४ सालमा स्थापित सो विद्यालयमा हाल १३२ विद्यार्थी अध्ययन गर्छन् । पुरानो ६ कोठे भवन पर्याप्त नभएपछि जिल्ला शिक्षा कार्यालयबाट प्राप्त १० लाख रुपैयाँ लागतमा नयाँ भवन निर्माण गरिएको हो । ७ कक्षासम्म पढाइ हुने सो विद्यालयमा बाल विकास कक्षातर्फ मात्र ३७ जना विद्यार्थी छन् । विद्यालयबाट केही मिटर मात्र पूर्व भारतसँगको खुला सिमाना रहेका कारण भारतीय विद्यार्थीले पनि सो विद्यालयबाट शिक्षा प्राप्त गरिरहेको संस्थापक शिक्षक राईले जानकारी दिए । उनका अनुसार त्यहाँ ८ जना शिक्षक कार्यरत छन् । विद्यालयले एक विगाहा क्षेत्रफल भोगचलन गर्दै आए पनि सो जग्गा विद्यालयको स्वामित्वमा छैन ।
विभिन्न दाताहरुले विद्यालयलाई १० वटा कम्प्यूटर सहयोग गरेका छन् र नयाँ भवनको एउटा कोठालाई कम्प्यूटर कक्षको रुपमा प्रयोग गर्दै विद्यार्थीलाई कम्प्यूटरमा दक्ष बनाउने प्रयास गरिने प्रधानाध्यापक राजवंशी बताउँछन् । राजमार्गलाई मेची पारिको सो गाउँसम्म जोड्ने गरी भद्रपुर ३ मै मेची नदीमा झोलुंगे पूल निर्माणाधीन छ तर निर्माण सम्पन्न गर्नुपर्ने समयसीमा नाघिसक्दा पनि पूल सम्पन्न हुन नसक्दा वर्षातमा शिक्षक–विद्यार्थी र त्यहाँका वासिन्दाले ठूलै कठिनाइ व्यहोर्नु परिरहेको शिक्षक राई बताउँछन् ।


विद्यालय व्यवस्थापन समितिका अध्यक्ष कृष्ण राजवंशीको अध्यक्षतामा विद्यालयका संस्थापक शिक्षक कैलाश राईले सञ्चालन गरेको भवन उद्घाटन समारोहमा भद्रपुर न. पा. ३ नं वडाध्यक्ष कमला थुलुङ, नगर शिक्षा शाखा अधिकृत ज्ञानबहादुर पौडेल, चन्द्रगढी स्रोत केन्द्रका स्रोत व्यक्ति प्रेमबहादुर भुजेललगायतले शिक्षाको पहुँच सबै क्षेत्रमा पुर्याउन आवश्यक रहेको भन्दै भौगोलिक रुपमा सदरमुकामसँग जोडिन नसकेको मेचीपारिको सो गाउँलाई विशेष प्राथमिकतामा राखिनुपर्नेमा जोड दिए । विद्यालयका प्रधानाध्यापक चमकलाल राजवंशीले स्वागत गर्दै विद्यालयको गतिविधि जानकारी गराएका थिए ।

तपाईको प्रतिक्रिया

Admin
झापा  
Image
Image
Image

© 2018 Sajilokhabar.com  | Powered by DreamSYS IT Solution