जबरजस्ती करणी घटनामा आफन्त नै दोषी

Image

Spread the love
  •  
  •  
  •  
  •  
  •  

प्रयास लिम्बू
ताप्लेजुङ, २० चैत । ताप्लेजुङमा जबरजस्ती करणीका अधिकांस घटना दिउँसो हुने गरेको पाइएको छ । करणी घटनामा सबैभन्दा बढी आफन्त, नातेदार, साथीभाइ र चिनजानका मान्छे नै दोषी देखिएको समेत जिल्ला प्रहरी कार्यालयले बताएको छ । जबरजस्ती करणी र जबरजस्ती करणी उद्योगका पछिल्लो घटनाको समीक्षा गर्दै जिल्ला प्रहरी कार्यालयले उक्त जनाएको हो ।
जिल्ला प्रहरी कार्यालयका प्रमुख प्रहरी नायव उपरीक्षक ज्ञानेन्द्रबहादुर बस्नेतले भने, “करणी घटनामा मुख्यत पीडित पक्षका आफन्त, नातेदार, साथीभाइ र चिनजानका मान्छे नै दोषी पाइएका छन् ।” मङ्गलबार सदरमुकाम फुङ्लिङमा सरोकारवालासँग प्रहरीले गरेको अन्तक्र्रियामा प्रनाउ बस्नेतले कार्यपत्र प्रस्तुत गर्दै अनुसन्धानका क्रममा उक्त अवस्था पाइएको बताए ।
यस्तै २०६५ देखि चालू आर्थिक वर्षको हालसम्मको करिव १० वर्षे अवधिमा भएका जबरजस्ती करणी र करणी उद्योगका ७१ वटा घटनामध्ये ३० वटा घटना मध्यान्ह १२ बजेदेखि साँझ ६ बजेको समयभित्र भएका पाइएको बस्नेतले जानकारी दिए । उनका अनुसार विभिन्न १९ वटा घटना रातको समयमा, १३ वटा बिहान ६ बजेदेखि मध्यान्ह १२ बजेभित्र र नौ वटा घटना बिहानको समयमा भएको पाइएको छ । पछिल्लो अवधिका ३३ वटा करणी घटना अधिकांश एकान्त स्थान, घरमा एक्लै रहेको बेलामा भएका छन् ।
प्रहरीमा दिएको जाहेरी अनुसार २३ वटा घटनाका पीडतहरुले ललाई–फकाई करणी भएको उल्लेख छ । तीन वटा घटना मादक पदार्थ सेवन पछिको उन्मादका कारण, पाँच वटा डर, त्रास र धम्की देखाएर र दुई–दुई वटा घटना जागिर लगाइदिने प्रलोभन देखाएर तथा बाटो ढुकी एक्लै पारेर भएका छन् । यस्तै सामुहिक बलात्कारको एक, घरको ढोका फोडेर एक र घरबाट अपहरण गरी शरीर बन्धक बनाएर एउटा जबरजस्ती करणी घटना भएको प्रहरीको तथ्याङ्क रहेको छ ।
यता सबैभन्दा बढी १६ वर्ष मुनिका उमेर समूहका बालिका जबरजस्ती करणी र जबरजस्ती करणी उद्योगका घटनाबाट प्रभावित भएका छन् । प्रनाउ बस्नेतका अनुसार ७१ वटा यस्ता घटनामध्ये १६ वर्षभन्दा कम उमेर समूहका २८ जना पीडित देखिएका छन् । यी मध्ये १० वर्ष मुनिका उमेर समूहका सात र १० दखि १६ वर्षसम्मका २१ जना पीडित देखिएका छन् ।
२० वर्ष माथिका उमेर समूहका पीडितको सङ्ख्या २७ रहेको छ भने १६ देखि २० वर्षभित्रको उमेर समूहका १६ जना पीडित देखिएका छन् । बस्नेतका अनुसार आर्थिक वर्ष २०७२।७३ मा जबरजस्ती करणीका आठ र जबरजस्ती करणी उद्योगका पाँच गरी १३ वटा मुद्दा दर्ता भएका थिए । आव २०७३।७४ मा जबरजस्ती करणीका सात र जबरजस्ती करणी उद्योगका तीन गरी १० वटा मुद्दा दर्ता भएकोमा चालू आवको यो अवधिसम्ममा १० वटा मुद्दा दर्ता भइसकेका छन् ।
अन्तक्र्रियामा जिल्ला समन्वय समितिका प्रमुख घनेन्द्र मादेन, फुङ्लिङ नगरपालिकाका कार्यबाहक प्रमुख बलबहादुर गुरुङ र सङ्घीय प्रहरी कार्यालय चन्द्रगढी झापाका प्रमुख प्रहरी बरिष्ठ उपरीक्षक पिताम्बर अधिकारीसहित स्थानीय तहका निर्वाचित जनप्रतिनिधि र सरोकारवाला सहभागी कार्यक्रममा बस्नेतले उमेरगत रुपमा जबरजस्ती करणीका घटनाबाट पीडित हुनेहरुको पछिल्लो तथ्याङ्क सुनाए । उनका अनुसार पछिल्लो वर्षहरुमा महिला तथा बालबालिका सम्बन्धी हुने गरेका अपराधका घटना समेत बढ्दै गएका छन् ।
आव २०७२।७३ मा कुल अपराधका घटनामध्ये महिला र बालबालिका सम्बन्धी अपराधका घटनाको प्रतिशत ११ रहेकोमा ०७३।७४ मा बढेर १३ र चालू आवको यो अवधिसम्ममा १४ प्रतिशत पुगेको छ, आर्थिक वर्ष समाप्त हुन अझै तीन महिना बाँकी छ । मुलुकी ऐन २०२० लाई प्रतिस्थापन गर्न बनेको मुलुकी फौज्दारी अपराध संहिता २०७४ र कार्यविधि महिला तथा बालबालिका सम्बन्धी अपराधको साजयमा झन् कठोर बनेको छ । कार्यक्रम प्रमुख जिल्ला अधिकारी मोहनबहादुर जिसीको अध्यक्षतामा भएको थियो ।

तपाईको प्रतिक्रिया

Admin
दमक, झापा  
Image
Image
Image

© 2018 Sajilokhabar.com  | Powered by DreamSYS IT Solution