बजेटमा मन्त्रीको ‘सिन्डिकेट’विरुद्ध सत्तापक्षकै सांसद

Image

Spread the love
  •  
  •  
  •  
  •  
  •  

काठमाडौ, असार १ । आगामी वर्षको बजेटमा कर्णालीको विकाससम्बन्धी ५७ योजना समेटिएका छन् । तीमध्ये ४४ वटा पर्यटन राज्यमन्त्री धनबहादुर बुढाको जिल्ला डोल्पामा मात्र पारिएको छ । खेलकुदमन्त्री जगत विश्वकर्मा आफ्नो निर्वाचन क्षेत्र कास्की ३ मा खेलकुदसम्बन्धी २४ कार्यक्रम राख्न सफल भएका छन् । यी केही उदाहरण मात्र हुन् । नयाँ र साना योजनाको बजेट संघीय सरकारले विनियोजन गर्ने भन्दै योजना माग्न आउने सांसदलाई जवाफ फर्काएका अधिकांश मन्त्रीले एकलौटी आफ्नो क्षेत्रमा मात्र बजेट विनियोजन गरेको भन्दै सत्तारुढ नेकपाका सांसदहरूले सरकारविरुद्ध प्रतिनिधिसभामा चर्को आक्रोश पोखेका छन् ।

मन्त्रालयगत बजेट विनियोजनप्रति सत्तापक्षकै सांसद आक्रोशित भएपछि प्रतिनिधिसभा बैठक एक दिन स्थगित गरी सत्तारुढ नेकपाको संसदीय दलको बैठक शुक्रबार बस्ने तयारी भइरहेको नेताहरूले बताएका छन् । सांसदहरूको आक्रोश साम्य पार्न र उनीहरूलाई सम्झाउनकै लागि दलको बैठक बोलाइएको नेताहरूले बताएका छन् ।

प्रतिनिधिसभाको बिहीबारको बैठकमा नेकपाका सांसद मोहन बानियाँले बजेटका कारण जिल्लामा गएर अनुहार देखाउनसमेत समस्या हुने अवस्था आएको दुखेसो गरे । ‘त्यो बजेट लिएर कसरी हामी जिल्ला फर्कने ? अनुहार कसरी देखाउने ? कविता वाचनबाट बोल्न सुरु गरेका उनले आक्रोशित हुँदै भने, ‘भनौं भने घरकै बुहारी, नभनौं भने भ्रष्टै पारी’ ।’ मुगुका सांसद उनले नयाँ वर्षका दिन प्रधानमन्त्री केपी ओलीले रारा सम्बोधनका क्रममा घोषणा गरेको कार्यक्रमसमेत बजेटमा नराखिएको भन्दै दुःख व्यक्त गरे । ‘२०७५ साल वैशाख १ गते प्रधानमन्त्रीले रारामा सम्बोधन गरेको कुरा पनि बजेटमा समावेश भएन’, उनले भने, ‘खोइ प्रधानमन्त्रीको रारा सम्बोधनको कुरा बजेटमा ? ’

नेकपाका अर्का सांसद झपट रावलले बजेट विनियोजन गर्दा मन्त्रीहरूले आफ्नो जिल्ला निर्वाचन क्षेत्रभन्दा माथि उठ्न नसकेको आरोप लगाए । ‘तपाईंहरूले नेपालकै मन्त्री हुँ भन्ने हेक्कासमेत राख्न सक्नु भएन’, उनले भने, ‘नाकको टुप्पोभन्दा पर पनि नेपाली बस्छन् भन्ने हेक्का राख्न सक्नु भएन ।’ खेलकुदमन्त्री विश्वकर्माले आफ्नो निर्वाचन क्षेत्रमा ६५ करोड बजेट विनियोजन गर्दा सिंगो प्रदेश ७ मा २ करोड मात्र बजेट विनियोजन गरेको भन्दै आक्रोशित उनले भने, ‘७ नम्बर प्रदेशका जनताले तपाईंहरूलाई धिक्कार्लान् । त्यहाँका जनताको पाप लाग्ला ।’ http://annapurnapost.com

तपाईको प्रतिक्रिया

Admin
झापा  
Image
Image
Image

© 2018 Sajilokhabar.com  | Powered by DreamSYS IT Solution