विपद् व्यवस्थापनका लागि ताप्लेजुङमा २२ बुँदे कार्ययोजना

Image

Spread the love
  •  
  •  
  •  
  •  
  •  

प्रयास लिम्बू, ताप्लेजुङ, असार १ । यसवर्ष मनसुनको समय सुरु भएसँगै मनसुनबाट हुने बिपद् प्रतिकार्यका लागि ताप्लेजुङमा कार्ययोजना तयार भएको छ । जिल्ला विपद् व्यवस्थापन समितिले तयार पारेको कार्ययोजनामा बाढी र पहिरोबाट बढी जोखिम क्षेत्रको पहिचानदेखि बिपद् व्यवस्थापन निकायसँग रहेका खोज तथा उद्दार सामग्री थप गर्नेसम्म योजना समावेश गरिएका छन् ।

जिल्ला विपद् व्यवस्थापन समितिका संयोजक तथा प्रमुख जिल्ला अधिकारी मोहबहादुर जिसीले बिपद्का लागि २२ बुँदे आपतकालिन कार्ययोजना तयार भएको जानकारी दिनुभयो । प्रजिअ जिसीकाअनुसार बिपद् व्यवस्थापन प्रतिकार्यका लागि नौवटा क्लस्टर बनाइएका छन् । ति क्लस्टरहरुमा खाद्य तथा पोषण, खानपानी तथा सरसफाइ, स्वास्थ्य, शिक्षा, संरक्षण, खोज तथा उद्दार, आवास, सञ्चार र गैरखाद्य सहयोग रहेका छन् ।

कार्ययोजनामा बिपद्पछि आइपर्ने अवस्थालाई मध्यनजर गर्दै एक सय जना व्यक्तिलाई कम्तिमा तीन दिनसम्म पुग्ने खाद्य सामग्रीको मौज्दात गरिने उल्लेख छ । उक्त खाद्य सामग्री व्यवस्थापनका लागि ताप्लेजुङ उद्योग बाणिज्य सङ्घले नेतृत्व गर्ने पनि जनाइएको छ । यस्तै नेपाल रेडक्रस सोसाइटीको संयोजकत्वमा कम्तिमा ५० परिवारका लागि गैरखाद्य सामग्रीको व्यवस्थापन हुने छ भने जिल्ला स्वास्थ्य कार्यालयको नेतृत्वमा प्राथमिक उपचारका सामानका साथ औषधि समेतको व्यवस्थापन कार्य अघि बढ्ने गरी कार्ययोजना तयार भएको प्रजिअ जिसीले जानकारी दिनुभयो ।

स्थानीय सरकार र रेडक्रसको समन्वयमा मनसुनबाट हुनसक्ने बिपद् बिरुद्ध जनचेतनामुलक कार्यक्रम सञ्चालन गरिने र सबै स्थानीय तहमा बिपद् आइपरेको समयका लागि खुल्ला तथा सुरक्षित स्थानको छनौट गर्ने पनि कार्ययोजनामा उल्लेख छ । बिपद् प्रतिकार्यका लागि कार्ययोजनासँगै पूर्व तयारी गरिसकिएको समेत जिसीले जानकारी दिनुभयो । उहाँका अनुसार जिल्ला समन्वय समिति र जिल्ला प्रशासन कार्यालयको सहयोग तथा समन्वयमा बिपद् व्यवस्थापनका लागि सम्भावित सहयोगी संस्थाको पनि सूची तयार पारिएको छ ।

यस्तै तोेकिएका सबै नौ वटै क्लस्टरले समेत आपतकालीन मनसुन प्रतिकार्य योजना तयार पार्दै गरेको जानकारी समितिले जानकारी दिएको छ । पहाडी जिल्लामा सबैभन्दा बढी जोखिम र क्षति पहिरोबाट हुने गर्छ । बाढी तथा पहिरोका लागि जेठ देखि असोज महिना सम्मको समय जोखिमपूर्ण मानिन्छ । यसबाहेक छिटफुट रुपमा अरु बेला समेत सुख्खा पहिरो जाने गरेको छ विगतको अवस्थालाई ध्यानमा राखी नौ वटा क्लस्टर बाहेक सबै स्थानीय तहले आफ्नो कार्यक्षेत्रभर लागू हुनेगरी मनसुन प्रतिकार्ययोजना बनाउने जिल्ला स्तरीय कार्ययोजना तयार भएको प्रजिअ जिसीले बताउनुभयो ।

जिल्लाको एक नगरपालिका र आठ गाउँपालिका गरी नौ स्थानीय तहमा ६१ वटा वडा रहेका छन् । मनसुन प्रतिकार्ययोजनामा क्रममा बिपद्को जानकारी सङ्कलन तथा परिस्थिति अद्यावधिक गर्न सम्बन्धित क्षेत्रको समन्वय बैठक बस्ने, प्रारम्भिक तथ्याङ्कको समिक्षा गर्ने, प्रभावित क्षेत्रमा सार्वजनिक सेवा उपलब्ध गराउने संस्थाको समिक्षा गर्ने र उद्दार सेवा, क्षमता र उद्दार सामग्रीको समिक्षा गर्ने कार्य हुने छन् ।

बिपद् पश्चात प्रारम्भिक मानवीय सहयोगको प्राथमिकता क्रम निर्धारण गर्ने, उपकरणसहित खोजी तथा उद्दार टोली खटाउने, सहयोगमा संलग्न व्यक्तिहरुको सुरक्षा गर्ने, राहत सामग्रीसहित बितरण टोली परिचालन गर्ने र प्रादेशिक तथा सङ्घीय संस्थाहरुलाई पनि सहयोगका लागि आह्वान गर्ने जस्ता बिषय कार्ययोजनामा उल्लेख छन् । यस्तै प्रभावित स्थानीय तहसँग समन्वयात्मक बैठक बस्ने, क्लस्टरगत रुपमा समन्वय बैठक बस्ने र परिस्थिति सम्बन्धी प्रतिवेदनलाई अद्यावधिक पार्ने लगायतका कार्य पनि बिपद् प्रतिकार्य योजनामा समावेश गरिएको समिति संयोजक एवम् प्रजिअ जिसीले जानकारी दिनुभयो ।

तपाईको प्रतिक्रिया

Admin
झापा  
Image
Image
Image

© 2018 Sajilokhabar.com  | Powered by DreamSYS IT Solution