पन्ध्र दिनभित्र संस्था नवीकरण गर्न समय, नगरे खारेज

Image

Spread the love
  •  
  •  
  •  
  •  
  •  

प्रयास लिम्बू, ताप्लेजुङ, जेठ ३१ । सरकारले राष्ट्रिय तथा अन्तराष्ट्रिय गैर सरकारी संस्थाहरुको खुल्ला क्षेत्राधिकार कटौती गर्दै सञ्चालन, दर्ता र नवीकरणमा कडाइ गरेको छ । गैर सरकारी संस्थाका लागि सरकारको उक्त निर्णयसँगै नवीकरण नभएकालाई नवीकरण गरिसक्न पन्ध्र दिनको समयावधि दिएको छ । जिल्ला प्रशासन कार्यालय ताप्लेजुङले सार्वजनिक सूचना जारी गर्दै १५ दिनभित्र नवीकरण नगरे संस्था खारेजीको प्रक्रिया अघि बढ्ने पनि जनाएको छ ।

गृह मन्त्रालयको परिपत्रानुसार जिल्लाभित्र रहेका गैरसरकारी संस्थाहरुका लागि १५ दिनभित्र नवीकरण गरिसक्नेगरी समय उपलब्ध गराएको प्रमुख जिल्ला अधिकारी मोहनबहादुर जिसीले जानकारी दिनुभयो । यसअघि बहुउद्देश्य रहनेगरी दर्ता भएका संस्थाहरुले अब नवीकरण गर्दा एउटै मात्र उद्देश्य किटान गर्नुपर्ने छ भने नयाँ दर्ता गर्नेहरुले पनि आफ्नो विधानमा एउटा मात्र उद्देश्य उल्लेख गर्नुपर्ने भएको प्रजिअ जिसीले बताउनुभयो ।

तोकिएको समयावधिभित्र नवीकरण नभएका संस्थाको दर्ता स्वतः खारेज गर्नेगरी गृह मन्त्रालयको निर्देशन रहेकोले सोहीअनुसार कार्य अघि बढाइने जिसीको भनाइ छ । उहाँका अनुसार एकभन्दा बढी क्षेत्रमा काम गर्न नपाउने गरी बिधानमै एकमात्र उद्देश्य उल्लेख गरेका संस्थाहरुलाई मात्र नवीकरण र नयाँ दर्ताका लागि स्वीकृति दिइने छ । यस्तै अबदेखि संस्थाका पदाधिकारी तथा कार्यरत कर्मचारीको सम्पति विवरण समेत अनिवार्य पेश गर्नुपर्ने भएको उहाँले बताउनुभयो ।

सरकारको पछिल्लो यो निर्णय देशैभरका राष्ट्रिय तथा अन्तर्राष्ट्रिय गैर सरकारी संस्थाहरुमा एकसाथ लागू भएको प्रजिअ जिसीले जानकारी दिनुभयो । यसअघि आफ्नो कार्यक्षेत्रमा विविध उद्देश्य उल्लेख गरेका संस्थाको बिधान अब एउटै मात्र उद्देश्य रहनेगरी संशोधन हुने भएको छ । त्यस्तै संस्थाले कम्तिमा चौमासिक रुपमा प्रतिबेदन बुझाउनुपर्ने भएको पनि उहाँले बताउनुभयो ।

यता ताप्लेजुङमा हालसम्म कुल चार सय ९६ संस्था दर्ता भएकोमा एक सय १७ वटा संस्थाले मात्र दर्ता नवीकरण गरेका छन् । बाँकी तीन सय ७९ संस्थाको नवीकरण प्रक्रिया बाँकी रहेको जिल्ला प्रशासन कार्यालयले जनाएको छ । यही जेठ २५ गते मन्त्रीस्तरीय निर्णय भएको र यसलाई कार्यान्वयनका लागि सरकारले देशभरका जिल्ला प्रशासन कार्यालयमा परिपत्र गरेको हो ।

तपाईको प्रतिक्रिया

Admin
झापा  
Image
Image
Image

© 2018 Sajilokhabar.com  | Powered by DreamSYS IT Solution