अपराधका घटना न्यूनिकरण गर्न सशक्त अभियान थालिने

Image

Spread the love
  •  
  •  
  •  
  •  
  •  

ताप्लेजुङ, असार १ गते । ताप्लेजुङमा अपराधका घटना न्यूनिकरण गर्न सशक्त अभियान थालिने भएको छ । अपराधका घटना न्यूनिकरणका लागि जिल्ला सुरक्षा समिति ताप्लेजुङले सशक्त अभियान थाल्ने जनाएको हो ।

अपराधिक गतिविधि नियन्त्रणका लागि बिगतमा अपराधिक पृष्ठभूमि भएका व्यक्ति, अहिले अपराधिक गतिविधिमा संलग्न वा भविश्यमा अपराधिक क्रियाकलापमा संलग्न हुनसक्ने व्यक्तिको पहिचान गरेर छुट्टा–छुट्टै सूची तयार पारी उनीहरु माथि कडा निगारानी बढाएको जिल्ला सुरक्षा समितिले जनाएको छ ।

समिति अध्यक्ष एवम् प्रमुख जिल्ला अधिकारी मोहनबहादुर जिसीले अपराधिक क्रियाकलापको न्यूनिकरण गर्ने अभियानअन्तर्गत अवैध हातहतियार नियन्त्रण गर्न इजाजत प्राप्त हतियारमध्ये कति नवीकरण भए र कति भएनन् भन्ने तथ्याङ्क तयार पारी नवीकरण भएका र नभएका हतियारको अवस्था विश्लेषण गरिने जानकारी दिनुभयो । प्रजिअ जिसीले अपराधिक गतिविधि नियन्त्रण कार्य कसरी र कसले गर्ने भन्ने विषयमा सुरक्षा समितिले विशेष योजना बनाएको बताउनुभयो ।

अभियान अन्तर्गत तय गरिएको योजनामा नियन्त्रणका लागि के र कसले गर्ने सबै बिषय उल्लेख गरी जिम्मेवारी समेत दिएको जिसीले जानकारी दिनुभयो । उहाँका अनुसार अपराधिक गतिविधिको निगारानीका लागि गस्तीदेखि हवाई चेकिङ सम्मको योजना बनेको छ । राजमार्ग क्षेत्रसहित सुरक्षा गस्ती गरिने कार्यको समष्टिगत योजना बनेको बताउँदै उक्त योजनामा गस्ती र निगारानी कहिले, कसरी र कसले गर्ने भन्ने विषय तय भएको उहाँको भनाइ छ ।

जिल्लाको सुरक्षा मजबुत बनाउन सदरमुकाम फुङ्लिङ क्षेत्रका सीसी क्यामराको अधिकतम् प्रयोग गर्ने, बिग्रिएका क्यामरा तुरुन्त मर्मतसम्भार गर्ने र केही स्थानमा थप गर्ने सम्मका योजना सुरक्षार्थ प्रयोगमा ल्याइने भएको समितिले जनाएको छ । सबै किसिमको अपराध नियन्त्रणका लागि योजनाबद्ध ढङ्गले अघि बढ्ने तयारीका अभियानको सुरुवात गरेको समितिले जानकारी दिएको छ ।

यस्तै सुरक्षा फौजको जिम्मेवारी बाहेक अपराधिक गतिविधि नियन्त्रणका कार्यका लागि जनचेतनामुलक कार्यक्रम समेत अघि बढाइने भएको छ । जनचेतनामुकल कार्यक्रम महिनामा एक÷एक पटक बिद्यालय स्तरमा र समुदाय स्तरमा आयोजना गरिने छ । यसबाहेक हरेक १५÷१५ दिनमा ग्रामीण स्तरबाटै सार्वजनिक सेवा प्रदान गर्ने उद्देश्यले आयोजना हुने घुम्ति सेवा शिविरमा समेत सार्वजनिक कार्यक्रममार्फत जनचेतनाका कार्यक्रम प्रवाह हुने जिल्ला सुरक्षा समितिले जनाएको छ ।

ताप्लेजुङका प्रहरी प्रमुख प्रहरी नायव उपरीक्षक ज्ञानेन्द्रबहादुर बस्नेतले अपराधिक गतिविधि नियन्त्रणका लागि बिशेष योजनाका साथ कार्य अघि बढाइन लागेको जानकारी दिनुभयो । प्रनाउ बस्नेतले अपराधिक गतिविधि नियन्त्रण कार्यमा स्थानीय समुदायको पनि साथ र सहयोग अनिवार्य रहेको बताउनुभयो । नागरिक र प्रहरीको सहकार्यबाट अपराधिक गतिविधि नियन्त्रण सम्भव रहेको बताउँदै उहाँले अपराधिक गतिविधि नियन्त्रणका लागि कार्ययोजनाको प्रभावकारी कार्यान्वयन गरिने जानकारी दिनुभयो ।

तपाईको प्रतिक्रिया

Admin
झापा  
Image
Image
Image

© 2018 Sajilokhabar.com  | Powered by DreamSYS IT Solution