काठमाडौं, ६ चैत । ऊर्जा, जलस्रोत तथा सिँचाइमन्त्री दीपक खड्काले अब घरमै लोडसेडिङ हुने अवस्था आएको बताउनुभएको छ । मन्त्री खड्काले साँझको समयमा लोडसेडिङ हुने अवस्था रहेको बताउनुभएको हो।
भारतबाट झन्डै ८०० मेगावाट विद्युत् आयात भइरहेको र स्वदेशी उत्पादन एक हजार मेगावाटको हाराहारीमा रहेकाले लोडसेडिङ नदेखिएको उहाले जिकिर गर्नुभयो।
बुधबार राष्ट्रियसभामा सांसदहरूका प्रश्नको जवाफ दिँदै उहाले नेपाल विद्युत् प्राधिकरणले सही ढंगले काम गर्न नसकेको आरोप लगाएका छन्। लोडसेडिङको अन्त्य भनिए पनि उद्योगमा हालसम्म लोडसेडिङ नहटेको उहाको भनाइ छ।
प्राधिकरणका कार्यकारी निर्देशक कुलमान घिसिङलाई उज्यालोको नायक बनाएको भन्दै उनले असन्तुष्टि जनाए। “उज्यालोको नायक भनेको उहाँ (कुलमान घिसिङ) होइन है। बरु यो धन्यवाद भारत सरकारलाई दिऊँ। निजी क्षेत्रलाई दिऊँ, जसले उत्पादन गरेको छ। जसले परिपूर्ति गरिदिएको छ,’ उहाले भन्नुभयो।
मन्त्री खड्काले प्राधिकरण नाफा गएको भनिएपनि महालेखा परीक्षकको कार्यालयको प्रतिवेदनमा २ खर्ब रुपैयाँभन्दा बढी घाटा देखाएको बताउनुभयो।
