काठमाडौ, १० मंसिर । प्रहरी हिरासतमा रहेका मेडिकल व्यवसायी दुर्गा प्रसाईंलाई अस्पताल भर्ना गरिएको छ । आइतबार साँझ प्रसाईंलाई वीर अस्पताल भर्ना गरिएको हो ।
जिल्ला अदालत काठमाडौंमा प्रसाईँले आफू क्यान्सरको विरामी भएको बताएपछि अदालतले उपचारको उचित व्यवस्था मिलाउन भनेको थियो । त्यसपछि प्रसाईंलाई स्वास्थ्य परिक्षणका लागि वीर अस्पताल लगिएको थियो । त्यहाँ चिकित्सकको सल्लाह अनुसार प्रसाईंलाई भर्ना गरिएको एक जना प्रहरी अधिकृतले जानकारी दिए ।
अदालतले प्रसाईंलाई थप पाँच दिन हिरासतमा राखेर अनुसन्धान गर्न अनुमति दिएको छ । प्रधानमन्त्री केपी शर्मा ओलीले कम्बोडियाको टेलिकममा २१ करोड अमेरिकी डलर लगानी गरेको दाबीसहित भिडिओ सार्वजनिक गरेपछि प्रहरीले उनलाई भक्तपुरस्थित घरैबाट पक्राउ गरेको थियो ।
प्रसाईंविरुद्ध प्रहरीले सम्पत्ति शुद्धीकरण, लिखत किर्ते, आपराधिक लाभ र संगठित अपराधलगायतका कसुरमा अनुसन्धान अघि बढाइरहेको छ ।
