झापा, २८ साउन । भारत पश्चिम बंगाल, दार्जिलिङ जिल्लाको बागडोगरामा स्कोरपियो गाडीको ठक्करबाट ६ जना भक्तजनको घटनास्थलमै मृत्यु भएको छ।
साउनको अन्तिम सोमबार बागडोगरास्थित जंगलीबाबा मन्दिरमा जल चढाउन पैदल गइरहेका भक्तजनलार्ई स्कोरपियो गाडीले ठक्कर दिएको थियो।
एसके ०८ पी ०७३७ नम्बरको अनियन्त्रित गाडीको ठक्करबाट १० जना भक्तजनमध्ये ६ जनाको घटनास्थलमै मृत्यु भएको भारतीय प्रहरीले जनाएको छ। मृत्यु हुनेहरूमा गोविन्द चौधरी, अमलेश चौधरी, प्रह्लाद राय, कनक बर्मन, प्रणव राय, हिमेश राय चौधरी रहेका छन्।
दुर्घटना आज बिहान ५ बजेको समयमा ३१ नम्बर राष्ट्रिय राजमार्ग अन्तर्गत मुनि चिया बगान नजिकै भएको हो। ठक्कर दिने गाडीमा बाबा धामबाट फर्किएका श्रद्धालुहरू सवार थिए। गाडी राजमार्ग किनारदेखि तल खसेको थियो।
उनीहरू पनि घाइते भएका छन्। घाइतेहरूलाई उपचारका लागि उत्तरबंग मेडिकल कलेज लगिएको छ। ६ जनाको मृत्युले दुई गाउँ अहिले शोकमा डुबेको छ। घटनापछी आक्रोसित स्थानीयले केही समय राजमार्ग अवरुद्ध थरेका छन् ।
