रामेछाप, १४ मंसिर । रामेछापमा फोर्स गाडी दुर्घटना हुँदा ५ जनाको मृत्यु भएको छ ।
रामेछापको गोकुलगंगा गाउँपालिका–३ सिमलडाँडामा भएको उक्त दुर्घटनामा ५ जनाको घटनास्थलमै मृत्यु भएको हो । उक्त गाडी काठमाडौंबाट रामेछापतर्फ गइरहेको थियो ।
जिल्ला प्रहरी कार्यालय रामेछापका अनुसार गाडी सडकबाट ३ सय मिटर तल खसेको छ ।
रामेछापका प्रमुख जिल्ला अधिकारी राजु पौडेलका अनुसार दुर्घटनामा तीन जना घाइते भएका छन्। तीनमध्ये एक जना गम्भीर घाइते रहेको उहाँको भनाइ छ। घाइतेको स्थानीय अस्पतालमा उपचार भइराखेको छ। दुर्घटनामा एक बालकसहित तीन जना घाइते भएका हुन्।
दुर्घटनामा परेर गोकुलगंगा गाउँपालिका वडा नम्बर ४ का वडाध्यक्ष रामचन्द्र बस्नेतसहित ५ जनाको मृत्यु भएको जिल्ला प्रहरी कार्यालय रामेछापका प्रमुख डिएसपी प्रदीपकुमार सिंहले जानकारी दिनुभयो।
उहाँका अनुसार दुर्घटनामा मृत्यु हुनेमा बस चालक हिराबहादुर कार्कीसमेत हुनुहुन्छ। अन्य मृतकको पहिचान खुलेको छैन।
