सर्लाही, भदौ ३ गते । पूर्व पश्चिम राजमार्ग अन्तर्गत सर्लाहीको ईश्वरपुर नगरपालिकास्थित बाँके जङ्गलमा सोमबार बिहान इलेक्ट्रिक हाइस पल्टिँदा ६ जना यात्रु घाइते भएका छन् ।
काठमाडौँबाट सर्लाहीको गोडैतातर्फ आउँदै गरेको बागमती प्रदेश ०६-००१ ज ००६६ नम्बरको हायस अनियन्त्रित भई बाँके जङ्गलस्थित अमुवा पुल नजिकै दुर्घटनामा परेको हो ।
हायस दाहिने साइडमा गएर पल्टँदा गाडीमा सवार यात्रु गोडैता नगरपालिका-९, बकैनियाका २७ वर्षीय सरोजकुमार चौधरी, २४ वर्षीय सुशील कुमार चौधरी, २३ वर्षीय चुनचुन महतो, २६ वर्षीय रामजी पासवान, १९ वर्षीय सुमन महतो र गोडैता नगरपालिका-२, जयनगरका २७ वर्षीय नवीन महतो घाइते भएका प्रहरीले जनाएको छ ।
घाइतेमध्ये पाँच जना मोडेल अस्पताल लालबन्दीमा उपचारपछि डिस्चार्ज भइसकेका र छाती र बाँखा खुट्टामा चोट लागेर घाइते गोडैता नगरपालिका-२, जयपुरका २७ वर्षीय सरोजकुमार चौधरीको लालबन्दीमा नै उपचार चलिरहेको इलाका प्रहरी कार्यालय केशरगन्जका प्रहरी नायब उपरीक्षक (डिएसपी) मानप्रसाद श्रेष्ठले जानकारी दिनुभयो ।
दुर्घटनापछि हाइस चालक प्रहरी नियन्त्रणमा रहेका छन् । हायस घटनास्थलबाट प्रहरी चौकी फूलजोरमा ल्याइ राखिएको छ ।
