काठमाडौं, ३ भदौ । बझाङको बुङ्गल नगरपालिका–१० स्थित टुमेडामा गएराति आएको पहिरोले एक घर पुरिँदा एकै परिवारका चार जनाको मृत्यु भएको छ भने ६ जना घाइते भएका छन् ।
सुदूरपश्चिम प्रदेश प्रहरी कार्यालयकाअनुसार मृत्यु हुनेहरूमा ५५ वर्षकी काली धामी, २५ वर्षकी गोल्की धामी, ६ वर्षकी आकृति धामी र ३ वर्षकी लक्ष्मी धामी रहनुभएको छ । पहिरोमा बेपत्ता भएकाहरूको शव आज बिहान फेला परेको प्रहरीले जनाएको छ ।
घटनास्थलमा रहेका शवहरू पोष्टमार्टमका लागि पठाउने तयारी भइरहेको छ । जिल्ला प्रहरी कार्यालय बझाङको टोली घटनास्थलमा पुगिसकेको छ ।
पहिरो खस्नेबित्तिकै स्थानीय बासिन्दाहरूको प्रयासले ६२ वर्षीय घरमुली वीरबहादुर धामी, १६ वर्षीया कमला धामी, ३० वर्षीय उज्जवल धामी, १० वर्षीय रोशन धामी, २० वर्षीया शान्ती धामी र पाहुना ७१ वर्षीय अम्बादत्त जोशीको सकुशल उद्धार गरिएको थियो ।
पहिरोले घर पूर्ण रुपमा बगाएको छ । साथै, घरमा रहेका ५ वटा बाख्रा पनि बगाएको प्रहरीले जनाएको छ ।
