अमेरिका, ८ चैत । राष्ट्रपति जो बाइडेनले संयुक्त राज्य अमेरिकामा गाडी उत्पादन कम्पनीका लागि अहिलेसम्मकै कडा नियमको घोषणा गरेका छन् ।
उनले गाडी उद्योगको क्षेत्रमा विद्युतीय गाडीलाई प्रोत्साहनका लागि कडा नियम घोषणा गरेको बीबीसीले जनाएको छ । यो नियममा २०३२ सम्ममा ५६ प्रतिशत अमेरिकी विद्युतीय गाडी बिक्री वितरण गरिसक्ने लक्ष्य समावेश गरिएको खबरमा उल्लेख छ ।
लक्ष्य भेट्न सफल भएमा अमेरिकाको विद्युतीय गाडी उद्योगको क्षेत्रमा अहिलेको स्तरबाट ठूलो वृद्धि हुनेछ । यसअघि गएको वर्षदेखि नै विद्युतीय कार उत्पादकहरुलाई छुटको व्यवस्था गरिएको थियो । बाइडेनको प्रशासन कार्यालयले ग्रहको तापक्रम बढाउने ग्यास उत्पादनमा नाटकीय रूपमा कम गर्ने उद्देश्यले विद्युतीय गाडी उत्पादन तथा बिक्रीवितरणको लक्ष्य बढाइएको जनाएको छ ।
राष्ट्रपतिले घोषणा गरेको पछिल्लो नियमले आउँदो ३० वर्षमा ७ अर्ब टन कार्बन डाइअक्साइड उत्सर्जनलाई रोक्न मद्दत गर्ने वातावरणीय संरक्षण एजेन्सीले जनाएको छ । वातावरणीय क्षेत्रका समूहहरूले राष्ट्रपतिको यो कदमलाई उपायलाई स्वागत गरेका छन् । अमेरिकाले २०३५ देखि पेट्रोलबाट चल्ने सबै कारको बिक्रीमा प्रतिबन्ध लगाउने तयारी गरिरहेको खबरमा उल्लेख छ ।
