अमेरिका, ६ वैशाख । अमेरिकाले आउँदो मे १२ मा कोभिड शिखर सम्मेलन गर्ने भएको छ ।
कोरोना महामारीको अन्त्य र भविष्यमा हुने उथलपुथलको योजना बनाउनको लागि विश्वव्यापी शिखर सम्मेलन आयोजना गर्न लागेको ह्वाइटहाउसलाई उदृत गर्दै समाचारसंस्था एएफपीले जनाएको छ ।
शिखर सम्मेलनमा वर्तमान जी सेभेनको अध्यक्ष जर्मनी, जी २० को अध्यक्ष इन्डोनेसिया, अफ्रिकी सङ्घ अध्यक्ष सेनेगल र बेलिज, क्यारिकोम क्यारिबियन समूहको अहिलेका अध्यक्ष देशहरुसहित अमेरिकाले भर्चुअल भेलाको सह-अध्यक्षता गर्नेछ ।
शिखर सम्मेलनले कोभिड-१९ महामारीको तीव्र चरणको अन्त्य गर्न र भविष्यमा देखापर्न सक्ने स्वास्थ्य खतराहरूको लागि तयारी गर्न सामूहिक प्रयासलाई दोब्बर बनाउने ह्वाइटहाउसले निकालेको विज्ञप्तिमा उल्लेख छ ।
कोरोना महामारी नियन्त्रण उन्मुख भइरहेका बेला चीन, भारत लगायतका देशमा पुनः सङ्क्रमण बढ्न थालेपछि विश्वव्यापी चिन्ता बढेको छ ।
