काठमाडौं, १५ भदौ । हुथी विद्रोहीहरूले इसराइलको हवाई हमलामा यमनका प्रधानमन्त्री अहमद गालिब अल–रहाबी र अन्य उच्च अधिकारीहरू मारिएको दाबी गरेका छन् ।
हुथी राजनीतिक परिषद् प्रमुख महदी अल–मशातले भिडियो सन्देशमा यसको पुष्टि गर्दै रक्तपातको प्रतिशोध लिने चेतावनी दिएका छन् ।
हुथी सञ्चालित टेलिभिजनले पनि प्रधानमन्त्री मारिएको र केही मन्त्रीहरू गम्भीर घाइते भएको समाचार सार्वजनिक गरेको छ ।
यसबारे स्वतन्त्र पुष्टि भने बाँकी छ ।
इसराइलका रक्षामन्त्री बेन कात्जले अमेरिकन मिडियालाई भनेका छन् कि आक्रमणमा प्रधानमन्त्रीसहित उच्च अधिकारीहरूलाई निशाना बनाइएको थियो ।
आक्रमणमा राष्ट्रपति भवन नजिकै सैन्य आधार, विद्युत् केन्द्र र इन्धन भण्डारण केन्द्रमा समेत बम खसेको बताइएको छ ।
गत दुई वर्षयता इसराइलले इरान–समर्थित समूहका नेता र उच्च अधिकारीहरूलाई योजनाबद्ध आक्रमण गर्दै आएको छ ।
