रुपन्देही, २६ कात्तिक । रुपन्देही क्षेत्र नं.१ का प्रतिनिधिसभा सदस्य पदका स्वतन्त्र उमेदवार घनश्याम भुसालले देश बनाउने र लोकतन्त्रलाई बलियो बनाउन जनताले फैसला गर्ने बेला आएको बताएका छन् ।
शनिबार रुपन्देही क्षेत्र नं.१ अन्र्तगत देवदह नगरपालिकामा घरदैलो गर्ने क्रममा भुसालले संविधानलाई सफल कार्यान्वयन गर्दै मुलुकलाई विकासको बाटोमा अघि बढाउने वा संविधान मास्नेको पक्षमा लाग्ने भन्ने फैसला जनताले गर्ने बेला आएको बताएका हुन् ।
उनले आफ्नो अहंकार र दम्भका कारण केपी ओलीले लोकतन्त्र र संविधान विरोधी काम गरेको आरोप लगाए । एमाले परित्याग गरी गठबन्धनको सहयोगमा स्वतन्त्र उमेदवार बनेका भुसालले देशको विकासलाई द्रुत गतिमा अघि बढाउन र विकासको हिसावले रुपन्देहीलाई देशकै नमुना जिल्ला बनाउन आफू उमेदवार बनेको बताए ।
आफू पनि लामो समय एमालेमै रहेर काम गरेको प्रष्ट पार्दै उनले केपी ओलीको दम्भ र अहमताका कारण पार्टीमा रहन नसकेको धारणा पनि राखेका थिए ।
