बर्दिया, ३१ वैशाख । नेपाली कांग्रेसका सांसद सञ्जयकुमार गौतम आमरण अनसनमा बसेका छन् ।
बर्दियाको जब्दीघाटमा रहेको बबई नदी माथि भासिएको पुलको स्पान हटाउनु पर्ने र तत्काल नयाँ पुल निर्माण गर्नुपर्ने लगायतका माग राख्दै उनी हिजोदेखि अनसनमा बसेका हन् ।
उनले बबई नदीको जब्दीघाटमा भासिएको पुलको स्पान हटाएर तत्काल नयाँ पुल निर्माण गर्नुपर्ने, बबई नदीमा तटबन्ध निर्माण गर्नुपर्ने, बबई सिँचाइ आयोजनामा बजेट थप्नुपर्ने, बर्दियाको भुरिगाउँदेखि तेलपानी हुँदै सुर्खेतसम्म सडक निर्माण यसै वर्षदेखि सुरु गर्नुपर्ने लगायतका १५ बुँदे माग राखेका छन् । नदीको जब्दीघाट पुलमुनि सांसद गौतमसँगै लुम्बिनी प्रदेश सभा सदस्य भुवनेश्वर चौधरी पनि अनसनमा बसेका छन् । स्थानीय पालिकाका जनप्रतिनिधिहरु पनि उनलाई साथ दिन रिले अनसनमा बसेका छन् ।
आफूले सदनमा धेरै पटक बाढीमा भत्किएको बबई नदीको जब्दीघाटमा पुल निर्माणका लागि आवाज उठाए पनि राज्यले बेवास्ता गरेकाले बाध्य भएर अनसनमा बस्नु परेको उनले बताए । पप्पु कन्स्ट्रक्सनले निर्माण कार्य सम्पन्न गरेको केही महिनामै जब्दीघाटको पुल २०७४ साल साउनमा भासिएको थियो भने ०७९ साल असोज २० गते बबई नदीमा आएकोे बाढीले पुल बगाएको थियो ।
‘पुल भासिएको ६ वर्ष भइसक्यो, अझैसम्म पनि निर्माण गर्नतर्फ सरकारले चासो दिएको छैन, पुल नहुँदा सदरमुकाम गुलरिया र बारबर्दिया नगरपालिकाका झण्डै १ लाख स्थानीयबासिन्दा प्रभावित भएका छन् ‘उनले भने । आफ्नो क्षेत्रको जनप्रतिनिधि भएकाले पुल निर्माणलगायत नागरिकसँग प्रत्यक्ष सरोकार राख्ने विषय पूरा नभएसम्म अनसन जारी राख्ने उनले बताएका हुन् ।
