ललितपुर, १० फागुन । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले अहिले देशको अवस्था आँखाले देखेको जस्तो सामान्य नरहेको बताउनुभएको छ ।
राष्ट्रिय प्रजातान्त्रिक युवा संगठन ललितपुरको जिल्ला अधिवेशनमा बोल्दै अध्यक्ष लिङ्देनले अर्थतन्त्र, शान्ति सुरक्षा, रोजगारी साथै अन्तर्राष्ट्रय रुपमा मानसम्मानका दृष्टिकोणले देश ओरालो लागेको बताउनुभएको हो ।
उहाले भन्नुभयो, ‘अहिले देश विशिष्ट अवस्थामा छ । देश हाम्रो आँखाले देखेको जस्तो सामान्य अवस्थामा छैन । अर्थतन्त्र, शान्ति सुरक्षा, रोजगारीका हिसावले, अन्तर्राष्ट्रिय रुपमा मानसम्मानका दृष्टिकोणले देश ओरालो लागेको अवस्था छ । यसलाई निरन्तर रुपमा पालिराख्ने हो भने युवाले जुन बेला देशको नेतृत्व गर्ने मौका आउँछ त्यसबेला देश रहन्छ की रहँदैन भन्ने अवस्थामा छ ।’
साथै उहाले अहिले देशको अवस्था आउनमा कांग्रेस, एमाले र माओवादी जिम्मेवार रहेको बताए । उनले देश विग्रियो भने शेरबहादुर देउवा, केपी ओली र पुष्पकमल दाहाल प्रचण्डको केही नबिग्रने तर युवाहरुको भविष्य विग्रिने चिन्ता व्यक्त गर्नुभयो ।
उहाले भन्नुभयो, ‘यो देश विग्रियो भने शेरबहादुर देउवा, केपी ओली र प्रचण्डको केही बिग्रदैन । देश बिग्रियो भने युवाहरुको भविष्य बिग्रिने छ । देशको भविष्यसँग सबै भन्दा धेरै सरोकार र सम्बन्ध युवाहरुको छ । यसकारण युवाहरुले निर्माण गर्नुपर्ने र निर्वाह गर्नुपर्ने भूमिका महत्वपूर्ण छ । अहिले देशको यो अवस्था आउनमा कांग्रेस, एमाले र माओवादी जिम्मेवार छन् ।’
