इलाम, १४ चैत । नयाँ वर्ष वि.सं २०७९ को अवसरमा केचना कञ्चनजङ्घा पर्यटन तथा चलचित्र महोत्सव हुने भएको छ ।
इलाममा आगामी चैत २५ गतेदेखि वैशाख दुई गतेसम्म सो महोत्सव हुने भएको हो ।
कोरोनाको महामारी फैलिएपछि सुस्ताएको पर्यटन क्षेत्रलाई उकास्ने उद्देश्यले उक्त महोत्सव आयोजना गर्न लागिएको महोत्सव आयोजक समितिले जनाएको छ ।
इलामको ठूलो टुँडिखेलमा आयोजना गर्न लागिएको महोत्सवमा चार जिल्लाका ४२ पालिकाका आआफ्नै ७० स्टल राखिने र चार जिल्लामा बसोबास गर्ने विभिन्न जातजाति, भाषाभाषीका संस्कृति रहनसहन पनि अवलोकन गर्न पाइने बताइएको छ ।
खानाका विविध जातिका परिकार, यहाँको कृषि उत्पादन, कृषि पर्यटन पनि महोत्सवका मुख्य आकर्षण हुनेछन् । साथै चलचित्रसम्बन्धी विभिन्न तालिम तथा अन्तरक्रिया, साहित्यिक कार्यक्रम, रमाइलो मेलालगायतका विषय पनि समेटिने केचना कञ्चनजङ्घा पर्यटन विकास समितिका कार्यकारी निर्देशक केशव द्यौरालीले बताए ।
