विराटनगर, १६ साउन । राप्रपाको साथ नपाएपछि कोशी प्रदेशमा नयाँ सरकार गठनका लागि सत्ता गठबन्धनले अन्ततः सभामुखलाई राजीनामा गराउने भएको छ ।
गठबन्धनले प्रदेश प्रमुख पर्शुराम खापुङले दिएको आज साउन १६ गते बेलुका ५ बजेसम्मको समयमा नेपाली काँग्रेसका संसदीय दलका नेता उद्धव थापाको नेतृत्वमा बहुमतसहित सरकार गठनको दाबी प्रस्तुत गर्ने भएको छ ।
सर्वोच्च अदालतले गत ११ गते संवैधानिक प्रक्रियाअनुसार गठन नभएको भन्दै नेपाली कांग्रेस संसदीय दलका नेता थापा नेतृत्वको सरकारलाई २२ दिनमै बर्खास्त गरिदिएको थियो । थापा नेतृत्वको सरकार गत असार २१ गते गठन भएको थियो ।
