विराटनगर, १७ जेठ । कोशी प्रदेश सरकारबाट जनता समाजवादी पार्टी (जसपा) बाहिरिएको छ ।
मुख्यमन्त्री हिक्मत कार्की नेतृत्वको सरकारबाट कुनै निकास ननिस्कने भन्दै जसपाले स्वास्थ्यमन्त्री निर्मला लिम्बूलाई फिर्ता बोलाएको हो ।
बुधवार इटहरीमा बसेको प्रदेश समितिको बैठकले मन्त्री लिम्बूलाई सरकारबाट फिर्ता बोलाएर समर्थन फिर्ता लिने निर्णय गरेको जसपाका नेता जयराम यादवले जानकारी दिए ।
माओवादी केन्द्रले सरकारको समर्थन फिर्ता नलिएकाले कोशीमा एमालेले नेतृत्वको सरकार कायमै छ । कोशी प्रदेशमा एमालेका ४०, कांग्रेसका २९, माओवादी केन्द्रका १३, राप्रपाका छ, नेकपा (एकीकृत समाजवादी) का चार र जनता समाजवादी पार्टीका एक जना सांसद छन् । कोशी प्रदेशको सरकार परिवर्तनका लागि माओवादी र जनता समाजवादी पार्टीले पनि समर्थन फिर्ता लिन आवश्यक छ ।
