रौतहट, २५ मंसिर । बाराको पञ्चवर्षीय गढीमाई मेलाबाट सिरहा फर्किँदै गरेको स्कार्पियो रौतहटको चन्द्रनिगाहपुरमा दुर्घटना हुँदा आठ जनाको मृत्यु भएको छ ।
गढ़ीमाई मेलाबाट सिरहाको अर्नमा फर्किन लागेको बा १६ च ३१६२ नम्बरको गाडी राति १:१५ बजे दुर्घटना भएको थियो ।
दुर्घटनामा ज्यान गुमाउनेमा सिराहाको अर्नामा गाउँपालिका- ३ बंठियाटोल बस्ने वर्ष ६० कि लरुवतीदेवी महरा, सोही ठाउँकी ३० वर्षीया उर्मिला महरा, ५० वर्षीया रामकुमारी महरा, ५५ वर्षीया महगींदेवि महरा, ६२ वर्षीया फूलमन्तीदेवी चमार, ६० वर्षीया रामकुमारिदेवी महरा, ३० वर्षीया सकुन्तलादेवी महरा र अर्नामा ५ बलुवाटोल घर भएका स्कार्पिओ चालक ४० वर्षीय श्रीकुमार यादव छन्।
दुर्घटनामा सिराहाको अर्नामा ३ कै ३० वर्षीया राधा राम, सोही ठाउँका उमेश रामका २ वर्षीय छोरा आर्यन राम, २५ वर्षीया देवकुमारी महरा, उनका ७ वर्षीय छोरा रितिक महरा र ६० वर्षीया कन्यादेवी महरा घाइते भएका छन्।
घाइते मध्ये ४ जनाको चन्द्रनिगाहपुरमा उपचार भइरहेको छ भने एक जनालाई थप उपचारको लागि वीरगञ्ज पठाइएको छ ।
