रसुवा, १९ चैत । रसुवागढी नाकाबाट चालु आर्थिक वर्ष २०७८/७९ को आठ महिनामा दुई सय ८४ टन चिनियाँ खाद्य सामग्रीको आयात भएको छ ।
खाद्य आयात तथा निर्यात गुणस्तर प्रमाणीकरण कार्यालय रसुवाको तथ्याङ्कअनुसार फूल तथा सागपातजन्य ८५ दशमलव ५३ टन, खाद्यान्न दलहन तथा अन्य ३१ दशमलव ९ टन, मसलाजन्य १४ दशमलव ९३, मासुुजन्य २३ दशमलव ४६, दुग्धजन्य ८ दशमलव २, चिया तथा कफीजन्य ३८ दशमलव ४५ टन, माछाको अचार १४ दशमलव ४ टन र बदाम, सिजनिङ पाउडर, अजिनामोटो, रेड विन पेष्ट, डोमा लगायतका ६१ दशमलव ६७ टन खाद्य सामग्री आयात भएको हो ।
गएको आर्थिक वर्ष २०७७/७८ मा २ सय ७ टन चिनियाँ खाद्य सामग्री आयात भएको कार्यालयको तथ्याङ्क छ । चीनबाट सोया सस, भिनेगर, अचार, पिठो, सिन्के चाउचाउ, सिजनिङ पाउडर, छुर्पी, डोमा, भोटे चिया, चिकेन सुप, भेजिटेबल सुप, रेड विन पेष्ट, चामल आदि सामग्रीको आयात हुने गरेको छ । नाकाबाट खाद्यान्न दलहन तथा अन्य प्रकारका सामग्रीको आयात बढी हुने गरेको कार्यालयले जनाएको छ ।
