बिर्तामोड, १९ चैत । बिर्तामोड नगरपालिकाले वडा नम्बर २ मा ८० थान त्रिपाल वितरण गरेको छ । शुक्रवार साँझ आएको हावाहुरीसहितको असिना पानीले घरको छाना उडाएर विचल्लीमा परेका ७० घर परिवारलाई आइतवलार राहत स्वरुप त्रिपाल बितरण गरेको हो ।
६० थान बिर्तामोड नगरपालिका र २० थान नेपाल रेडक्रस सोसाइटी बिर्तामोड शाखाको सहयोगमा ८० थान त्रिपाल विभिन्न टोलमा पुगेर वितरण गरिएको हो । पीडितलाई नगर प्रमुख पवित्रा महतारा प्रसाईले त्रिपाल हस्तान्तरण गरेकी थिइन् ।
नगर प्रमुख प्रसाईले तत्काल किनेर व्यवस्थापन गर्न नसक्नेका लागि त्रिपाल वितरण गरिुएको बताइन् । उनले कृषकको क्षतिको विवरण संकलन गरेर कृषि ज्ञानकेन्द्रसँग समन्वय गरि आवश्यक सहयोगका लागि पहल गर्ने प्रतिवद्धता व्यत्तः गरिन् । नगर प्रमुख प्रसाईले आइतबार विहान वडा नम्बर २ का विभिन्न टोलमा पुगेर कृषिमा भएको क्षतिको अनुगमन गरेकी थिइन् ।
बिर्तामोड २ मा ७० वटा घर र ४२ वटा गाईगोठमा क्षति पुगेको छ । यस्तै ९० विगाह भन्दा बढी जग्गामा रहेको मकै तथा तरकारीबाली नष्ट भएको वडाअध्यक्ष किशोरकुमार पौडेलले जानकारी दिए ।
त्रिपाल वितरण कार्यक्रममा कार्यपालिका सदस्य तिला गौतम, वडा सदस्यहरु ओमनाथ गौतम, चेतन विमली लगायत स्थानीय विभिन्न टोल विकास संस्थाका प्रतिनिधिको सहभागिता थियो ।
बिर्तामोड नगरपालिकाले १० वटै वडामा भएको क्षतिको विवरण संकलन गर्ने कार्य गरिरहेको छ ।
