जापान, २६ चैत । जापानले रुसबाट कोइला आयातमा प्रतिबन्ध लगाएको छ ।
जापानी प्रधानमन्त्री फुमिओ किशिदाले रुसी कोइला आयातमा पूर्ण रूपमा प्रतिबन्ध लगाएको घोषणा गरेका छन् ।
यूक्रेनमा आक्रमण गरेको रुसले नागरिकको हत्या गर्ने र आणविक ऊर्जा केन्द्रलाई निशाना बनाउनु अन्तर्राष्ट्रिय मानवीय कानुनको उल्लङ्घन गरेको उनले टिप्पणी समेत गरेका छन् ।
जापानले अमेरिका र युरोपेली देशहरूसँग समन्वय गरेर रुस विरुद्धको आर्थिक नाकाबन्दीमा सहकार्य गर्दै आएको छ । प्रधानमन्त्री किशिदाले जापान युक्रेनको साथमा रहेको पनि बताएको बीबीसीले उल्लेख गरेको छ । भारत र चीनपछि जापान विश्वको तेस्रो ठूलो कोइला आयातकर्ता हो । जापानको कुल कोइला आयातको ११ प्रतिशत रुसबाट आउने गरेको थियो ।
यसैबीच जापानले आठ जना रुसी कूटनीतिज्ञलाई देश निकाला गरेको पनि जनाएको छ । यसअघि अष्ट्रियाले पनि आफ्नो देशमा रहेर कुटनीतिक मान्यता विपरीत काम गरेको भन्दै चार जना रुसी कूटनीतिज्ञलाई अप्रिल १२ भित्र देश छोड्न आदेश दिएको छ ।
