झापा, ११ भाद्र । झापाको कन्काई नगरपालिमा मंगलबार राति दुईवटा सवारी साधन एकापसमा जुध्दा एकजनाको मृत्यु भएको छ । दुर्घटनामा परी चारजना घाइते भएका छन् ।
जिल्ला ट्राफिक प्रहरी कार्यालयका अनुसार गएराति करिब ८:४० बजे मे १ च ३४४० नम्बरको मारुती भ्यान र मे १ च ५४४६ नम्बरको बोलेरो पिकअप आपसमा ठोक्किँदा दुर्घटना भएको हो । दुवै सवारी तीव्र गतिमा रहेकाले दुर्घटना भएको अनुमान गरिएको छ ।
दुर्घटनामा भेन चालक शिबसताक्षी ७ बस्ने २९ वर्षीय नवराज बाँस्कोटा घाइते अवस्थामा उद्धार गरी बीएण्डसी अस्पताल पठाएकोमा डाक्टरले चेकजाँच गर्दा उनको मृत्यु भइसकेको थियो ।
दुर्घटनामा घाइते शिबसताक्षी ७ बस्ने ४० वर्षीय पृथ्बीनाथ साह, उनकी श्रीमती ३७ वर्षीया पुनमदेबी साह , छोरा १४ वर्षीय प्रसन्न साह , छोरी ९ वर्षीया प्रन्सा साहको बीएण्डसी अस्पताल बिर्तामोडमा उपचार भइरहेको छ ।
पिकअप चालक धनकुटा महालक्ष्मी ८ बस्ने २४ वर्षीय सुमन पौडेल र दुबै सवारी साधनलाई इलाका प्रहरी कार्यालय बिर्तामोडले नियन्त्रणमा लिएको छ ।
