झापा, ८ माघ । आगामी प्रतिनिधिसभा निर्वाचन नजिकिँदै गर्दा झापा निर्वाचन क्षेत्र नम्बर ४ मा चुनावी माहोल थप सक्रिय बन्दै गएको छ। राष्ट्रिय प्रजातन्त्र पार्टी (राप्रपा) का नेता भक्ति प्रसाद सिटौलाको समर्थनमा मतदाता अभियान तीव्र पारिएको छ। समर्थकहरूले “देश बचाउने, देश बनाउने र देश जिताउने अभियान” भन्ने नारासहित घरदैलो तथा जनसम्पर्क कार्यक्रम विस्तार गरेका छन्।
स्थानीय अभियानकर्ताहरूका अनुसार सिटौलाले संघीयता खारेज गरी अभिभावकीय भूमिकामा राजसंस्था आवश्यक रहेको धारणा राख्दै आएका छन्। साथै, “सर्वधर्म समभाव” को मान्यतासहित नेपाललाई वैदिक सनातन हिन्दु राष्ट्रका रूपमा स्थापित गर्नुपर्ने दृष्टिकोण पनि उनको राजनीतिक एजेन्डामा समावेश छ।
समर्थकहरूले सिटौलाको पृष्ठभूमि अधिवक्ताको रूपमा रहेको उल्लेख गर्दै उनको कानुनी ज्ञान र अनुभवले संसदमा प्रभावकारी भूमिका खेल्ने विश्वास व्यक्त गरेका छन्। उनी शालीन, नैतिकवान, सक्षम र इमानदार नेताको रूपमा चिनिने भन्दै लोकतान्त्रिक मूल्य र पारदर्शिताप्रति प्रतिबद्ध रहेको दाबी गरिएको छ।
भ्रष्टाचारप्रति शून्य सहनशीलताको नीति अघि सार्दै सिटौलाले सार्वजनिक जीवनमा इमानदारीलाई सर्वोपरि ठान्ने बताएका छन्। समर्थकहरू “एक भोट सक्षम व्यक्तिलाई, एक भोट समानुपातिकमा पार्टीलाई” भन्ने सन्देशका साथ मतदातालाई परिवर्तनको पक्षमा उभिन आह्वान गरिरहेका छन्।
राजनीतिक विश्लेषकहरूका अनुसार झापा–४ मा राप्रपाको यो अभियानले चुनावी प्रतिस्पर्धालाई नयाँ आयाम दिएको छ। आगामी दिनमा प्रमुख दलहरूबीच मुद्दा, एजेन्डा र दृष्टिकोणका आधारमा कडा बहस हुने अपेक्षा गरिएको छ।
