इंग्ल्याण्ड, ४ साउन । पहिलो एकदिवसीय क्रिकेटमा दक्षिण अफ्रिकाले इंग्ल्याण्डलाई हराएको छ ।
चेस्टर ली स्ट्रीटमा गएराति भएको खेलमा दक्षिण अफ्रिका ६२ रनले विजयी भएको हो ।
टस जितेर पहिला ब्याटिङ गरेको दक्षिण अफ्रिकाले निर्धारित ५० ओभरमा ५ विकेट गुमाउँदै ३ सय ३३ रन बनाएको थियो । जितका लागि ३ सय ३४ रनको लक्ष्य पाएको घरेलु टोली इंग्ल्याण्ड ४६ ओभर ५ बलमा २ सय ७२ रनमा अलआउट भयो ।
उसका जोय रुटले सर्वाधिक ८६ रन बनाए । इङ्ल्यान्डका अलराउन्डर बेन स्टोक्सले यो खेलसँगै एकदिवसीय क्रिकेटबाट सन्यासको घोषणा गरेका छन् । उनले यो खेलमा जम्मा ५ रन बनाए ।
यसअघि दक्षिण अफ्रिकाका रास्सी भन डर डुसेनले १ सय ३३ रनको शतकीय पारी खेलेपछि दक्षिण अफ्रिकाले ३ सय ३३ रन बनाएको थियो ।
इंग्ल्यान्डका लियम लिभिङस्टोनले सर्वाधिक दुई विकेट लिए । साम करन, बायडन कार्स र मोईन अलीले एक-एक विकेट लिए । जितसँगै तीन खेलको एकदिवसीय श्रृंखलामा दक्षिण अफ्रिकाले १-० को अग्रता बनाएको छ ।
