काठमाडौं, २१ जेठ । दक्षिण कोरियामा राष्ट्रपति चयनका लागि भएको चुनावमा विपक्षी डेमोक्रेटिक पार्टीका उम्मेदवार ली जे म्युङले जित्नुभएको छ ।
स्थानीय समयअनुसार मङ्गलवार मध्यरातसम्म भएको मतगणनापछि हार स्वीकार गर्दै सत्तारूढ दलका किम मुन सूले म्युङलाई बधाइसमेत दिनुभएको छ ।
चार करोड ४४ लाख योग्य मतदातामध्ये झन्डै ८० प्रतिशतले मतदान गरेका त्यहाँको निर्वाचन आयोगले जनाएको छ ।
यो सन् १९९७ पछिको सबैभन्दा धेरै मतदान भएको हो । जीतसँगै ६१ वर्षीय लीले आज देशको राष्ट्रपतिको रूपमा शपथ लिने अपेक्षा गरिएको बीबीसीले जनाएको छ ।
उहाँले आफ्नो विजय भाषणमा दक्षिण कोरियाको अर्थतन्त्रलाई पुनः शुरू गर्ने र उत्तरसँग शान्ति स्थापना गर्ने प्रतिबद्धता जनाउनुभएको छ ।
पूर्वराष्ट्रपति युन सुक–योलले ‘मार्शल ल’ को घोषणा गरेपछि उहाँलाई महाभियोग लगाएर पदबाट हटाइएको थियो । यसबीचमा विभाजनकारी विरोध प्रदर्शन र महिनौंको राजनीतिक अराजकता निम्तिएको थियो ।
