काठमाडौं, ४ भाद्र । राष्ट्रिय प्रजातन्त्र पार्टी (राप्रपा)का अध्यक्ष एवं पूर्व उपप्रधानमन्त्री राजेन्द्र लिङ्देनले देशमा बढ्दो बेरोजगारीका कारण छोराछोरीलाई बिदेशमा बेच्नु परिरहेको बताउनुभएको छ ।
झापाको भद्रपुरमा बुधवार आयोजित राप्रपा झापा क्षेत्र नम्बर ३ को क्षेत्रीय अधिवेशन घोषणा सभालाई सम्बोधन गर्दै पार्टी अध्यक्ष लिङ्देनले आज देश पूर्ण रुपमा बेरोजगार उत्पादन गर्ने कारखाना र भ्रष्टाचारीहरूले कमाई खाने मैदानमा परिणत भएको बताउनु भयो । जसकारण परिवार चलाउन छोराछोरी बेचिनु परिरहेको उहाको भनाई थियो ।
सरकारले देशमै सय जनालाई रोजगारी दिने एउटा पनि उद्योगधन्दा स्थापना गर्न नसकेको बताउँदै लिङ्देनले भन्नुुभयो, ‘देशभित्र तपाईँको, तपाईँको छोराछोरी र युवाहरूले गरी खाने वातावरणको सृजना हुन सके की सकेन त्यो महत्त्वपूर्ण कुरा हो ।’
‘नेपाली काँग्रेस र एमाले मिलेर चलाएको देशको हालत हेर्नुहोस् त ?,’ अध्यक्ष लिङ्देनले भन्नुभयो, ‘देशलाई बरबाद पार्ने काममा काँग्रेस र एमाले दुवै बराबर जिम्मेवार छन्, देश लुट्ने बेलामा यिनीहरू एकै ठाउँ पनि उभिन्छन् ।’
आज मन्त्रीहरूको बीचमा छिटो कमाउनेमा प्रतिस्पर्धा चलिरहेको आरोप लगाउँदै उहाले भन्नुभयो, ‘कसले छिटो कमाउने, कसले धेरै कमाउने भनेर ।’ मन्त्रीहरू एकपछि अर्को गर्दै भ्रष्टाचार काण्डमा मुछिएका घटनाहरू सार्वजनिक भइरहेका छन् । त्यसमा पनि प्रतिस्पर्धा चलिरहेको छ । ‘तर, देशका सामान्य एउटा किसान मल बिउँबाट बञ्जित हुनु परेको बनेको छ,’ उहाले भननुभयो ।
हामीले यही अवस्थालाई स्वीकार गरिराख्नु भनेको हामी मात्र होइन, हाम्रो भावी सन्ततिको भविष्यको बरबादीमा सहभागी हुनु हो । यो देश बनाउन काँग्रेस र कम्युनिस्टको विकल्पमा हामी उभिने बेला आएको छ । ‘त्यो शक्ति भनेको राप्रपा मात्रै हो,’ उहाले भन्नुभयो, काँग्रेस, एमाले र माओवादी पार्टीविरुद्ध भन्दा पनि पार्टीको नाममा देशमा जुन लुटतन्त्र मच्चिरहेको छ त्यसको विरुद्धमा हामी उभिएका छौँ ।
