काठमाडौं, १० भाद्र । विश्वकप छनोटको तयारीका लागि अस्ट्रेलिया भ्रमणमा रहेको नेपाली राष्ट्रिय क्रिकेट टोलीले पहिलो अभ्यास खेलमा सानदार जित निकालेको छ । ब्याटिङमा ओपनर आसिफ शेखको विष्फोटक अर्धशतक र बलिङमा लेगस्पिनर सन्दीप लामिछानेको जादुयी ह्याट्रिकको मद्दतले नेपालले अस्ट्रेलियन क्यापिटल टेरिटोरी (एसीटी) लाई ४१ रनले पराजित गरेको हो ।
डार्विनमा नेपालले प्रस्तुत गरेको १७८ रनको चुनौतीपूर्ण लक्ष्य पछ्याएको एसीटी, सन्दीपको घातक बलिङसामू टिक्न नसक्दा १७.२ ओभरमा १३६ रनमा अलआउट भयो । एसीटीका लागि जेक स्मिथले ५० रनको अर्धशतकीय पारी खेल्दै नेपाललाई केही समय दबाबमा राखेका थिए । तर, खेलमा सन्दीप लामिछाने चम्किएपछि एसीटीको इनिङ्स धराशायी बन्यो ।
आफ्नो स्पेलमा उत्कृष्ट लयमा देखिएका सन्दीपले लगातार तीन बलमा तीन विकेट लिँदै ह्याट्रिक पूरा गरे । उनले कुल ४ ओभरमा ३१ रन खर्चेर ह्याट्रिकसहित ५ विकेट लिए । उनको घातक बलिङ नै नेपालको जितको मुख्य आधार बन्यो । नेपालका लागि करण केसीले २ तथा कुशल भुर्तेल र रुपेश सिंहले समान एक-एक विकेट लिए ।
त्यसअघि टस हारेर पहिले ब्याटिङ गरेको नेपालले निर्धारित २० ओभरमा ८ विकेट गुमाएर १७७ रन बनाएको थियो । नेपालको इनिङ्समा ओपनर आसिफ शेख नायक बने । उनले मात्र ३८ बलमा ५ छक्का र ४ चौकासहित ६९ रनको तुफानी पारी खेलेका थिए । कप्तान रोहित पौडेलले पनि ३६ रनको महत्वपूर्ण योगदान दिए ।
यो जितसँगै नेपाली टोलीको मनोबल उच्च भएको छ । नेपालले आजै एसीटीसँग दोस्रो टी-२० अभ्यास खेल खेल्नेछ । यसपछि २८ र ३० अगस्टमा साउथ अस्ट्रेलियाको टोलीसँग दुई टी-२० र एक एकदिवसीय खेल खेल्ने तालिका छ
