मेचीनगर, ३० भदौ । मेचीनगर-१२ मा रहेको पारिजात महिला सीप विकास केन्द्रले तीज मिलन तथा दर खाने कार्यक्रम शनिबार सम्पन्न गरेको छ ।
संस्थाकी अध्यक्ष कमला अधिकारीको अध्यक्षतामा भएको कार्यक्रमको प्रमुख अतिथि मेचीनगर नगरपालिका वडा नं.१२ का वडाध्यक्ष मधुसुदन निरौला रहेका थिए ।
सो कार्यक्रममा शुभकामना आदानप्रदान, संगिनी साथै तीज गीतमा नृत्य गरेर मनोरञ्जन गरिएको थियो ।
उक्त अवसरमा २०७९ सालमा सम्पन्न एसईई परीक्षामा सामुदायिक विद्यालयबाट उत्कृष्ट जिपीए ल्याउने सरस्वती वाल कल्याण माध्यामिक विद्यालयका विद्यार्थी सम्पदा अधिकारी र टिविन्द्र अधिकारीलाई नगद र सम्मान पत्रसहित सम्मान गरिएको थियो ।
सो अवसरमा कार्यक्रमका प्रमुख अतिथि मेचीनगर नगरपालिका वडा नं.१२ का वडाध्यक्ष निरौला, वडा सदस्य कृष्णमाया बराइली लगायतले शुभकामना मन्तव्य राखेका थिए ।
पञ्चेबाजा बजाएर स्वागत गरिएको कार्यक्रमको सञ्चालन संस्थाका सचिव सरु खनालले गरेकी थिइन् ।
