काठमाडौं, १४ भदौ । प्रधानमन्त्री केपी शर्मा ओली जनवादी गणतन्त्र चीनका राष्ट्रपति सी चिनफिङको मैत्रीपूर्ण निमन्त्रणामा साङ्घाई सहयोग सङ्गठन (एससिओ) शिखर सम्मेलनमा भाग लिन २३ सदस्यीय नेपाली प्रतिनिधिमण्डलको नेतृत्व गर्दै आज चीनको तियान्जिनतर्फ प्रस्थान गर्नुभएको छ ।
त्रिभुवन अन्तरराष्ट्रिय विमानस्थलको अतिविशिष्ट कक्षमा प्रधानमन्त्री ओलीलाई उपप्रधानमन्त्री एवं सहरी विकासमन्त्री प्रकाशमान सिंह, गृहमन्त्री रमेश लेखक, परराष्ट्रमन्त्री डा आरजु राणा देउवा तथा मुख्यसचिव एकनारायण अर्यालले बिदाइ गर्नुभयो ।
प्रधानमन्त्रीको बिदाइका लागि नेपाल सरकारका उच्चपदस्थ अधिकृत, नेपाली सेना, नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभागका प्रमुख तथा नेपालस्थित चिनियाँ राजदूतावासका प्रतिनिधि विमानस्थल पुग्नुभएको थियो । त्यसअघि नेपाली सेनाको एक टुकडीले उहाँको सम्मानमा सम्मान गारत अर्पण गरेको थियो । प्रधानमन्त्री ओलीले सेप्टेम्बर ३ मा बेइजिङमा आयोजना हुने ८०औँ वार्षिकोत्सवका स्मृति कार्यक्रममा सहभागिता जनाउनुहुने भ्रमणको कार्यतालिकामा उल्लेख छ ।
परराष्ट्र मन्त्रालयका अनुसार भ्रमणका क्रममा प्रधानमन्त्री ओलीले तियानजिनमा जनवादी गणतन्त्र चीनका राष्ट्रपति सी चिनफिङसँग भेटवार्ता गर्नुहुने कार्यसूची रहेको छ । प्रधानमन्त्री ओलीले सेप्टेम्बर १ मा तियानजिनमा हुने साङ्घाई शिखर सम्मेलनलाई सम्बोधन गर्नुका साथै सम्मेलनको अवसरमा विश्वका राष्ट्रप्रमुख तथा सरकार प्रमुखसँग भेटवार्ता गर्नुहुने जनाइएको छ ।
त्यस्तै सम्मेलनको भोलिपल्ट बेइजिङमा जनवादी गणतन्त्र चीनका उपराष्ट्रपति हान झेङसँग भेट गर्नुहुने कार्यक्रम छ । भ्रमणको अन्तिम दिन जापानी आक्रमणमा विजय हासिल गरेको ८० औं वर्षगाँठको स्मृति बेइजिङमा आयोजना हुने समारोहमा प्रधानमन्त्री ओलीले विशेष सहभागिता जनाउनुहुने छ । उहाँको साथमा प्रधानमन्त्रीपत्नी राधिका शाक्यसहित भ्रमण दलमा शिक्षा, विज्ञान तथा प्रविधिमन्त्री रघुजी पन्त, संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, सांसद पूर्णबहादुर खड्का, प्रधानमन्त्रीका आर्थिक तथा विकास सल्लाहकार डा. युवराज खतिवडा, सांसद छविलाल विश्वकर्मालगायतका उच्चाधिकारी सहभागी रहनु भएको छ ।
विश्वका नेता एउटै मञ्चमा बेइजिङस्थित गोरखापत्र समाचारदाताका अनुसार चिनियाँ राष्ट्रपति चिनफिङले उद्घाटन गर्ने शिखर सम्मेलनमा एससिओका १० पूर्ण राष्ट्रसहित २० देशका राष्ट्रप्रमुख र सरकार प्रमुख तथा १० वटा अन्तर्राष्ट्रिय संस्थाको प्रमुखको सहभागिता सुनिश्चित भएको छ । भदौ १४ र १५ गते तियानिजनमा हुने सम्मेलनमा भारतका प्रधानमन्त्री नरेन्द्र मोदी, रुसका राष्ट्रपति भ्लादमिर पुटिन, बेलारुसका राष्ट्रपति अलेक्ज्यान्डर लुकासेन्को, इरानका राष्ट्रपति मसुद पेजेस्कियान, पाकिस्तानका प्रधानमन्त्री सहबाज सरिफ, कम्बोडियाका प्रधानमन्त्री हुन मनेत, टर्कीका राष्ट्रपति रेसिप तैयप एर्दोगान, माल्दिभ्सका राष्ट्रपति मोहम्मद मुइज्जुलगायतलाई उपस्थितिका लागि निमन्त्रणा पठाइएको चीनका परराष्ट्र मन्त्रालयका उपमन्त्री लु विनले प्रेस सम्मेलनमार्फत जानकारी दिनुभयो । सम्मेलनमा संयुक्त राष्ट्रसङ्घका महासचिव एन्टेनियो गुटर्रेस पनि सहभागी हुनुहुने छ ।
नेपाल सन् २०१६ मा एससिओमा संवाद साझेदारका रूपमा आबद्ध भएको थियो । सन् २००१ मा चीन, काजाकिस्तान, कीर्गिस्तान, रुस, ताजिकिस्तान र उज्बेकिस्तानद्वारा स्थापित सङ्घाई सहयोग सङ्गठनमा भारत, पाकिस्तान, इरान र बेलारुस पूर्ण सदस्य रहेका छन् । युरेसियन राजनीतिक, आर्थिक र अन्तर्राष्ट्रिय सुरक्षा सङ्गठनका रूपमा स्थापना भएको एससिओमा नेपालसहित कतार, श्रीलङ्का, टर्की, कम्बोडिया, अजरबैजान, माल्दिभ्स, म्यान्मार, संयुक्त अरब इमिरेट्स, आर्मेनिया, इजिप्ट, साउदी अरब, बहराइन र कुबेत संवाद साझेदार तथा मङ्गोलिया र अफगानिस्तान पर्यवेक्षकका रूपमा रहेका छन् ।
प्रधानमन्त्री ओली र चिनियाँ राष्ट्रपति चिनफिङबिच शनिबार नै द्विपक्षीय भेटवार्ता हुने छ । प्रधानमन्त्री ओलीले भदौ १६ गते सम्मेलनमा अतिथिका रूपमा सम्बोधन गर्नुहुने छ । प्रधानमन्त्री ओली भदौ १८ गते बेइजिङस्थित तियानमिन स्क्वायरमा हुने जापानी उपनिवेशविरुद्ध चीनले विजय प्राप्त गरेको र विश्व फासिस्टविरोधी दिवसको ८० औँ वार्षिकोत्सवमा हुने स्मृति समारोह तथा सैनिक परेडमा सहभागी हुनुहुने छ । सो समारोहमा २६ देशका राष्ट्रप्रमुख र सरकार प्रमुख सहभागी हुँदै छन् । जसमा रुसका राष्ट्रपति भ्लादिमिर पुटिन, उत्तर कोरियाका राष्ट्रपति किम जोङ उन, कम्बोडियाका राजा सिहामोनी, भियतनामका राष्ट्रपति, इन्डोनेसियाका राष्ट्रपति, मङ्गोलियाका राष्ट्रपति, मलेसियाका प्रधानमन्त्री, पाकिस्तानका प्रधानमन्त्री, माल्दिभ्सका राष्ट्रपतिलगायत रहनुभएको छ ।
