काठमाडौं, २ श्रावण । नेपाली कांग्रेस नेता तथा पूर्वमन्त्री अफ्ताब आलमलाई सफाइ दिने उच्च अदालत जनकपुरको वीरगञ्ज इजलासको फैसला विरुद्ध महान्यायाधिवक्ताको कार्यालयले सर्वोच्च अदालतमा पुनरावेदन गरेको छ ।
जिल्ला अदालत रौतहटले आलमलाई जन्मकैदको सजाय सुनाए पनि उच्च अदालतले प्रमाण नपुगेको भन्दै सफाइ दिएको थियो ।
तर, महान्यायाधिवक्ताको कार्यालयले उक्त फैसलाले प्रमाणहरूलाई बेवास्ता गरेको दाबी गर्दै पुनरावलोकनको माग गरेको हो ।
प्रवक्ता सूर्यराज दाहालका अनुसार बम विस्फोट भएको, घाइतेलाई जिउँदै इँटाभट्टामा जलाइएको र जीवित साक्षीसमेत रहेको पुष्टि भए पनि उच्च अदालतले ती प्रमाणहरूलाई विचार नगरेको पुनरावेदनमा उल्लेख छ ।
मुख्य साक्षी गौरीशंकर राम चमारको बयान र उनको शरीरमा भएको चोटबारेको मेडिकल रिपोर्टले पनि घटना पुष्टि गरेको दाबी गरिएको छ ।
फैसला सुनाउने न्यायाधीश खुसीप्रसाद थारु र अर्जुन महर्जन न्याय परिषद्को छानबिनमा छन् ।
अफ्ताब आलमसहित जन्मकैद सजाय पाएका अभियुक्तहरू उच्च अदालतको फैसलापछि जेलमुक्त भएका थिए ।
