काठमाडौँ, २४ भदौ । नेकपा एमालेका अध्यक्ष केपी शर्मा ओलीले बैंकहरूले गरिबका लागि ऋण प्रवाह नगरेकोमा असन्तुष्टि व्यक्त गरेका छन् ।
पार्टीको केन्द्रीय सहकारी तथा गरिबी निवारण विभागले आइतवार च्यासलमा आयोजना गरेको कार्यक्रममा अध्यक्ष ओलीले ठूला पुँजीपतिहरूलाई खोजेर अर्बौँ लगानी गर्ने बैंकहरूले गरिबलाई भने अझै पनि ऋण नदिएको बताएका हुन् ।
उनले साना बैंक तथा वित्तीय संस्थाले बाख्रापालनजस्ता व्यवसायका लागि दिएको लगानी पनि मुनाफा नभएपछि डुब्ने गरेको बताएका छन् ।
ओलीले गरिबलाई पनि बैंकहरूले कुनै व्यवसाय गर्नका लागि ‘सिड मनी’ को रूपमा ऋण प्रवाह गर्नुपर्ने बताए । सहकारी संस्थाहरूसँग सरकारले पनि सहकार्य गरेर अघि बढनुपर्ने उनको भनाइ छ ।
उनले भने, ‘बैंकहरूले ठूलाठूला पुँजीपति खोजेर लगानी गर्छ, साँच्चै जसलाई ऋण चाहिएको छ उसकहाँ बैंकको ऋण पुग्दै पुग्दैन । जो अर्बपति छ, उसँग मात्रै ऋण पुग्छ । ठूलाकोमा ऋण नपुगोस् भन्ने होइन । तर गरिबकोमा पनि पुग्नुपर्छ ।’
