भारत, ४ फागुन । भारतको प्रमुख प्रतिपक्षी दल इन्डियन कांग्रेसले आफ्नो पार्टीका सबै बैंक खाताहरू भारतको आयकर विभागले रोक्का गरिदिएको बताएको छ ।
भारतमा चुनाव हुनुभन्दा केही महिनाअघि मात्रै प्रमुख प्रतिपक्षी दलले बैंक खाता रोक्का भएको दाबी गरेको बीबीसी हिन्दीले जनाएको छ ।
कांग्रेस नेता मल्लिकार्जुन खर्गेले आफ्नो पार्टीका बैंक खाता रोक्का गर्ने कदमलाई ‘प्रजातन्त्रमाथिको प्रहार’ भएको बीबीसीको खबरमा उल्लेख छ । कांग्रेसको आरोपबारे सरकार र आयकर विभागले कुनै प्रतिक्रिया दिएका छैनन् ।
विभागले अनुसन्धानका लागि पार्टीका सबै खाताहरू रोक्का गरिएको जानकारी दिएको कांग्रेसका नेता अजय माकनले बताएका छन् । नेता माकनका अनुसार पार्टीको खातामा मानिसहरूले अनलाइनमार्फत दिएको चन्दाबाट पैसा जम्मा हुने गरेको छ । पार्टीको युवा सङ्गठनको खातामा भने सदस्यता शुल्कबाट रकम जम्मा हुने गरेको छ ।
युवा सङ्गठन युथ कांग्रेसको खाता पनि रोक्का भएको उनले बताए । खाता रोक्का भएका कारण पार्टीका सबै गतिविधि प्रभावित भएको माकनले दाबी गरेका छन् ।
पार्टीले सन् २०१८/१९ मा आयकरको विवरण बुझाउन ४५ दिन ढिला भएको कारण देखाउँदै यस्तो कारबाही गरेको भारतीय सञ्चारमाध्यमले जनाएका छन् । विभागले पार्टीका खाताहरू फुकुवा गर्न दुई अर्ब भारतीय रुपैयाँभन्दा बढी रकम जरिबाना तिर्न भनेको कांग्रेस नेता माकनले बताएका छन् ।
आलोचकहरूले नरेन्द्र मोदीको भारतीय जनता पार्टीले चुनाव नजिकिँदै गर्दा विपक्षी नेताहरूलाई दमन गर्न राज्य संयन्त्र दुरुपयोग गरेको आरोप लगाएका छन् ।
