काठमाडौं, १२ साउन । इंग्ल्याण्ड र भारतबीचको चौथो टेस्ट बराबरीमा सकिएको छ। ओल्ड ट्राफोर्डको एमिरेट्समा भएको यो खेलमा भारतले अन्तिम दिन शानदार ब्याटिङ प्रदर्शन गर्दै इंग्ल्याण्डलाई जितबाट वञ्चित गरेकाे हाे । यस बराबरीसँगै पाँच खेलको शृंखला २-१ ले इंग्ल्याण्डको पक्षमा रहेको छ र अब निर्णायक टेस्ट लन्डनको द किया ओभलमा हुनेछ।
भारतका कप्तान शुभमन गिलले १०३ रन प्रहार गर्दै यस शृंखलामा आफ्नो चौथो टेस्ट शतक र कुल नवौं टेस्ट शतक प्रहार गरे। यस्तै, वाशिङ्टन सुन्दर (१०१ नट आउट) ले आफ्नो पहिलो टेस्ट शतक र रविन्द्र जडेजा (१०७ नट आउट) ले पनि शतकीय पारी खेलेर भारतलाई इंग्ल्याण्डको पहिलो इनिङ्सको अग्रता कटाउन मद्दत गरे।
खेलको अन्तिम सेसनमा इंग्ल्याण्डका कप्तान बेन स्टोक्सले ड्रको प्रस्ताव राखेका थिए, त्यस समय भारतले ४ विकेट गुमाएर ७१ रनको अग्रता लिएको थियो। तर, जडेजा र वाशिङ्टन सुन्दरलाई शतक पूरा गर्न दिनका लागि भारतले सो प्रस्ताव अस्वीकार गर्यो।
भारतले यस खेलमा शानदार पुनरागमन गर्दै इंग्ल्याण्डलाई जित्नबाट रोक्यो। पाहुना टोलीले आफ्नो दोस्रो इनिङ्समा पाँच सत्रभन्दा बढी ब्याटिङ गरेर ४२५/४ रन बनायो। खेल सकिन १० ओभर बाँकी छँदा ड्रमा सहमति हुँदा भारत ११४ रनले अगाडि थियो।
कप्तान बेन स्टोक्सले चौथो दिन बलिङ नगरे पनि पाँचौं दिन दुई स्पेलमा बलिङ गर्दै केएल राहुललाई ९० रनमा एलबीडब्लु आउट गरे। जब शुभमन गिल १०३ रनमा जोफ्रा आर्चरको बलमा आउट भए, इंग्ल्याण्डसँग खेल जित्ने अवसर थियो। भारतका ४ विकेट गुमेका थिए र उनीहरू ८९ रनले पछाडि थिए, जबकि दुई सत्रभन्दा बढी समय ब्याटिङ गर्न बाँकी थियो।
तर, जो रुटले रविन्द्र जडेजालाई उनले सामना गरेको पहिलो बलमै स्लिपमा क्याच छोडे। त्यसपछि इंग्ल्याण्डले खासै मौका पाएन, किनकि जडेजा र वाशिङ्टन सुन्दर दुवैले शतक बनाए। उनीहरूको साझेदारी २०३ रनको अविजित रह्यो।
यस बराबरीसँगै सन् २०२२ मा स्टोक्स कप्तान बनेयता इंग्ल्याण्डले ४० टेस्टमध्ये यो दोस्रो मात्रै ड्र खेलेको हो। दुवै ड्र यस मैदानमा भएका छन्, जसमा २०२३ मा अस्ट्रेलियासँगको वर्षाले प्रभावित खेल पनि समावेश छ।
इंग्ल्याण्ड अझै २-१ ले अगाडि छ र अब दुवै टोलीले बिहीबारबाट सुरु हुने ओभलमा हुने अन्तिम टेस्टका लागि तयारी गर्नुपर्नेछ।
