काठमाडौँ, २४ जेठ । मच्छिन्द्र फुटबल क्लब शहीद स्मारक ‘ए’ डिभिजन लिग फुटबल २०७९ को उपविजेता बनेको छ ।
आज बुधवार दशरथ रङ्गशालामा भएको खेलमा मच्छिन्द्र क्लबले हिमालयन शेर्पा क्लबलाई ३-१ गोलले हराउँदै उपविजेता बनेको हो ।
मच्छिन्द्रका हाफिल ओलावालेले २ र विमल घर्तीमगरले १ गोल गरे । हिमालयनका लागि पिस्तोने मुताम्बाले गोल गरेका थिए ।
यो जितसँगै मच्छिन्द्रको ४२ अङ्क भएको छ । हिमालयन शेर्पा ३१ अङ्कसहित तालिकाको नवौँ स्थानमा छ ।
