न्युजिल्यान्ड, ११ साउन । फिफा महिला विश्व कप फुटबलमा आज भएको पहिलो खेलमा अमेरिका र नेदरल्यान्ड्सले बराबरी खेलेका छन् ।
न्युजिल्यान्डको वेलिङ्गटनमा भएको समूह ‘ई’ को खेलमा नेदरल्यान्ड्सले अग्रता जोगाउन नसक्दा खेलमा एक-एक गोलको बराबरी भएको हो ।
नेदरल्यान्ड्सले खेलको १७औँ मिनेटमा जिल रुर्डको गोलबाट अग्रता लिएको थियो तर अमेरिकाका लागि खेलको ६२औँ मिनेटमा लिन्डसे होरानले बराबरी गोल फर्काइन् । त्यसपछि कुनै गोल हुन नसक्दा खेल बराबरीमा सकिएको हो ।
बराबरीसँगै दुवै टोलीले अङ्क बाँडेका छन् । अमेरिका र नेदरल्यान्ड्सको समान चार अङ्क भएको छ । समूह ‘ई’ मा पोर्चुगल र भियतनाम अङ्कविहीन छन् ।
