झापा, २१ चैत । झापाको मेचीनगर नगरपालिकाले गठन गरेको मेचीनगर सञ्चार प्रतिष्ठानप्रति झापामा क्रियाशिल संघसंगठनले गम्भीर ध्यानाकर्षण भएको जनाएको छ ।
प्रेस युनियन, प्रेस सेन्टर नेपाल र समाजवादी प्रेस संगठनले मंगलबार संयुक्त विज्ञप्ती जारी गर्दै आफुहरुको ध्यानाकर्षण भएको जनाएका हुन ।
प्रतिष्ठानमार्फत पालिकालाई सञ्चारमैत्री बनाउने भन्दै गठन गरिएको प्रतिष्ठान स्वेच्छाचारी ढंगबाट गठन गरिएको भन्दै ती संगठनहरुले आपत्ति जनाएका हुन ।
पालिकाले सञ्चारकर्मीहरुसँग कुनै छलफल नगरी ऐन नै नबनाई कार्यविधिमार्फत प्रतिष्ठान गठन गरिनुले सञ्चार क्षेत्रमाथी हस्तक्षेप गरेको उनीहरुको ठहर छ । ‘मनोमानी ढंगले गठित प्रतिष्ठान तत्काल खारेज गरि मेचीनगरका आम सञ्चारकर्मीसँगको छलफलबाट सञ्चार ऐन र नियमावली बनाएर प्रतिष्ठान गठन गर्न जोडदार माग गर्दछौं,’ विज्ञप्तीमा भनिएको छ ।
उनीहरुले प्रतिष्ठानमार्फत सञ्चारमाध्यमलाई सवलीकरण गर्नु स्वागतयोग्य कदम भएतापनि प्रतिष्ठान गठन गर्दा सञ्चारकर्मीले थाहा नपाउनु दु:खद भएको जनाएका हुन ।
प्रेस युनियन झापाका कार्यबाहक अध्यक्ष गिरिराज भट्टराई, प्रेस सेन्टर झापाका अध्यक्ष राजु पाठक र समाजवादी प्रेस संगठन झापाका अध्यक्ष अनिलदेव राईले हस्ताक्षर गरेको विज्ञप्तीमा पालिकाले गरेको यो निर्णय तत्काल सच्याएर सञ्चारकर्मीसँग छलफल गरि सञ्चार ऐन बनाएर प्रतिष्ठान गठन गर्न उनीहरुले जोडदार माग गरेका छन ।
