काठमाडौं, १३ भदौ । दुई प्रतिपक्षी दलहरू राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले प्रधानमन्त्री केपी शर्मा ओलीको शुक्रबारको सम्बोधन बहिष्कार गर्ने निर्णय लिएका छन् ।
प्रधानमन्त्री ओलीले केही बेरमा प्रतिनिधिसभा बैठकमा सम्बोधन गर्ने कार्यसूची छ ।
भिजिट भिसा प्रकरणमा गृहमन्त्री रमेश लेखकको राजीनामा र उच्चस्तरीय छानबिन समिति माग गर्दै आन्दोलनरत रास्वपा र राप्रपाले विरोध जारी राख्ने भएका हुन् ।
रास्वपाका प्रवक्ता मनिष झाले आन्दोलन जारी रहने बताए । ‘हाम्रो आन्दोलन जारी छ, आज पनि निरन्तर रहन्छ । हामी प्रधानमन्त्रीको सम्बोधन सुन्दैनौँ’, उनले भने ।
राप्रपाका उपाध्यक्ष ध्रुवबहादुर प्रधानले पनि प्रधानमन्त्री ओलीको सम्बोधन नुसनी संसद् बहिष्कार गरिने बताए ।
प्रधानमन्त्री ओलीले चीन जानुअघि प्रतिनिधिसभा बैठकलाई सम्बोधन गर्दैछन् ।
साङघाई सहयोग संगठन (एससीओ) शिखर सम्मेलनमा भाग लिन चिनियाँ राष्ट्रपति सी चिनफिङको मैत्रीपूर्ण निमन्त्रणमा प्रधानमन्त्री शनिबार प्रस्थान गर्नेछन् । चीनपछि ओली भारत भ्रमणमा जाने छन् ।
