रुकुमपूर्व, २३ चैत । रुकुमपूर्वको पुथाउत्तरगङ्गा गाउँपालिका-३ रन्मामा दुई दिदीबहिनी मृत फेला परेका छन् ।
बुधबार साँझ सिस्नो टिप्न भनी निस्केका उनीहरु आज मृत फेला परेका हुन् ।
स्थानीय तारामान बुढाका दुई छोरी ११ वर्षीया रिना बुढामगर र नौ वर्षीया कालिमाया बुढामगर मृत फेला परेका गाउँपालिकाका अध्यक्ष पुनिराज घर्तीमगरले जानकारी दिए ।
बुधबार साँझ हराएका दुई बालिकाको स्थानीयले खोजी गर्दा आज बिहान रन्मा गाउँकै भिरमा मृत फेला पारेपछि प्रहरीलाई खबर आएको जिल्ला प्रहरी कार्यालयका प्रहरी प्रमुख नायब उपरीक्षक (डिएसपी) अञ्जना श्रेष्ठले जानकारी दिए ।
बालिकाको गरगहना लुटपाट गरी लुटेराले हत्या गरेको हुनसक्ने स्थानीयको आशङ्का छ ।
