काठमाडौँ, १२ जेठ । टीकापुर घटनामा जन्मकैदको सजाय भोगिरहेका पूर्वसांसद रेशम चौधरीको बाँकी कैद मिनाहा गर्ने निवेदन राष्ट्रपति कार्यालयले गृहमन्त्रालयमा फिर्ता पठाएको छ ।
मुलुकी फौजदारी कार्यविधि संहिताको दफा १५९ बमोजिम माफी दिनका लागि गृहले राष्ट्रपति कार्यालयमा निवेदन पठाएको थियो ।
राष्ट्रपति रामचन्द्र पौडेलका प्रेस सल्लाहकार किरण पोखरेलले ‘प्रचलित कानुन, यस सम्बन्धमा अदालतबाट भएको फैसला र सर्वोच्च अदालतबाट प्रतिपादित सिद्धान्तविपरीत नहुने गरी कानुन बमोजिम गर्नू’ भनेर निवेदन शुक्रबार गृह मन्त्रालयमा फिर्ता पठाइएको बताए ।
पोखरेलले पीडितको तर्फबाट परेको निवेदन पनि कानूनबमोजिम गर्नु भनेर गृहमा फिर्ता गरिएको बताएका हुन् ।
गृह मन्त्रालयले मन्त्रिपरिषदमा प्रस्ताव लगेपछि त्यहाँबाट कैद माफीका लागि राष्ट्रपतिसमक्ष फेरि सिफारिस गर्नुपर्ने व्यवस्था छ ।
