काठमाडौँ, २४ चैत । शहीद स्मारक ए डिभिजन लिग फुटबलमा मनाङ मर्स्याङ्दी क्लबले फ्रेन्ड्स क्लबलाई हराएको छ ।
च्यासल मैदान ललितपुरमा आज भएको खेलमा मनाङले फ्रेन्ड्सलाई २-० गोलले हराएको हो ।
मनाङका लागि कोफी कोउडुले दुई गोल गरे । यो जितसँगै मनाङ ६ खेलमा १४ अङ्कसहित तालिकाको शीर्ष स्थानमा उक्लिएको छ । फ्रेन्ड्स ६ खेलमा ४ अङ्कसहित १२ औँ स्थानमा छ ।
आजै एन्फा कम्प्लेक्स सातदोबाटोमा भएको खेलमा जावलाखेल युथ क्लब र एफसी खुमलटारले २-२ गोलको बराबरी खेलेका छन् । जावलाखेलका लागि एनकोटो मोसाबी फोडे फोफानाले गोल गरे । खुमलटारका लागि अभिषेक लिम्बु र मेसुके ओलुमाउलोले गोल गरेका हुन् ।
यो बराबरीसँगै जावलाखेल ७ खेलमा १४ अङ्कसहित तालिकाको दोस्रो स्थानमा छ । खुमलटार ७ खेलमा ७ अङ्कसहित नवौँ स्थानमा छ ।
