काठमाडौं, १ कार्तिक । पाँच पटकको विजेता भारतले साफ महिला च्याम्पियनसिपमा विजयी सुरुवात गरेको छ।
त्रिपुरेश्वरस्थित दशरथ रगंशालामा बिहिबार भएको उद्घाटन खेलमा भारतले पाकिस्तानविरुद्ध ५–२ को फराकिलो जित हात पारेको हो।
पहिलो हाफमा दबाबमा रहेको पाकिस्तानले दोस्रो हाफमा केही सुधारिएको प्रर्दशन गरे पनि टोलीको हार टार्न भने सकेन। भारतले सुरुवातबाट नै आक्रमणमा जोड दिएको थियो।
खेलको पहिलो हाफमा ४–१ को अग्रता बनाएको भारतले दोस्रो हाफमा १ गोल थप्दा थप १ गोल खान पुग्यो।
खेलको ४७ औँ मिनेटमा क्याला मारी सिद्दीकीको गोलमा पाकिस्तान खेलमा फर्कने संकेत गरेको थियो। रमिन अफ्रिदीको प्रहारलाई सिद्दीकीले नियन्त्रणमा लिर्दै गोल गरेपछि पाकिस्तानले भारतविरुद्ध ४–२ ले गोलअन्तर कम गरेको थियो।
खेलको ७८ औँ मिनेटमा डालिमा छिब्बरकोे कर्नरमा वैकल्पिक खेलाडी ज्योति चौहानको हेडर गोलमा भारतले ५–२ को अग्रता बनायो।
त्यसअघि पहिलो हाफको पाचौँ मिनेटमा रन्जना चानुको क्रसमा दाङमेई ग्रेसको गोलमा भारतले सुरुवाती अग्रता बनाएको थियो।
खेलको १७ औँ मिनेटमा मनीषाको गोलमा भारतले अग्रता दोब्बर पार्यो। मिडफिल्डबाट बल अघि बढाएकी मनीषाको प्रहार पहिलो बारमा लाग्दै गोलमा परिणत भएको थियो।
खेलको ३५ औँ मिनेटमा मनीषाले बल चलाएपछि बालादेवीको गोलमा भारतले ३–० को फराकिलो अग्रता बनाएको हो। पाकिस्तानकी गोलरक्षक निशा अस्रफले बल धेरै समय होल्ड गरेको भन्दै रेफ्रीले पेनाल्टी एरियाभित्र सिधै इन्डिरेक्ट फ्रि किकको इसारा गरेकी थिइन्।
खेलको ४३ औँ मिनेटमा पाकिस्तानकी कप्तान मारियाको आत्मघाती गोलमा भारतले अग्रता फराकिलो पार्यो।
रन्जनाको क्रसमा बालादेवीको हेडर पाकिस्तनकी गोलरक्षकले जोगाएपनि अन्जु तामाङको हेडर पुन गोलरक्षकले जोगाइन्। तर ग्रेसको प्रहार पाकिस्तानकी कप्तान मारिया खानलाई लाग्दै गोलमा परिणत भएको थियो।
पहिलो हाफको इन्ज्युरी समयमा पाकिस्तानले पेनाल्टीमा गोल गर्यो। भारतकी कप्तान आशालताले नादिया खानलाई लडाएपछि पाकिस्तानले पेनाल्टी अवसर पाएको थियो। पेनाल्टीमा पाएको मौकालाई पाकिस्तानकी सुहा हिरानीले खेर जान दिइनन्। र गोलअन्तर कम गरिन्।
च्याम्पियनसिपमा भोलि शुक्रबार दुई खेल हुनेछ। शुक्रबारको पहिलो खेलमा समूह बी का श्रीलंका र माल्दिभ्स खेल्नेछन्। सो खेल दिउँसो साढे १ बजे सुरु हुनेछ।
भोलिकै दोस्रो खेलमा घरेलु टोली नेपालले भुटानविरुद्ध खेल्नेछ। सो खेल साँझ साढे ५ बजे सुरु हुनेछ।
