झापा, ३१ भदौ । इलाका प्रहरी कार्यालय काँकरभिट्टाको नवनिर्मित भवनको आज प्रदेश नम्बर १ का आन्तरिक मामिला तथा कानुनमन्त्री केदार कार्कीले उद्घाटन गरेक छन् ।
मन्त्री कार्कीले भवन उद्घाटन समारोहलाई सम्बोधन गर्दै पूर्वको मुख्य सीमानाकामा आपराधिक घटना बढी हुने हुँदा त्यसलाई रोक्न प्रहरीलाई चनाखो भएर काम लाग्न निर्देशन दिए । उनले चाडपर्व नजिकै जाँदा सीमा क्षेत्रमा हुने चोरी, तस्करीलगायत आपराधिक घटनालाई रोक्न र जनतालाई सुरक्षाको प्रत्याभूति दिलाउन प्रतिबद्ध भएर लाग्न जिल्ला प्रहरीका सबै युनिटलाई आग्रह गरे। मन्त्री कार्कीले सुविधा सम्पन्न भवन निर्माण भए पनि प्रहरी नायब उपरीक्षकलगायत सबैलाई आवास आवश्यकता भएको हुँदा प्रदेश सरकारले पहिलो प्राथमिकतामा राखेर आवास निर्माणको कामलाई अघि बढाउने बताए।
कार्यक्रममा प्रदेश प्रहरी कार्यालयका प्रहरी नायब महानिरीक्षक सुदीप गिरी, मेचीनगर नगरपालिका प्रमुख गोपालचन्द्र बुढाथोकी, प्रमुख जिल्ला अधिकारी छविलाल रिजाललगायतले शुभकामना मन्तव्य व्यक्त गरे। कार्यक्रममा विसं २०२३ मा काँकरभिट्टा सीमानाकामा प्रहरी पोष्ट स्थापना गर्ने पूर्वप्रहरी हवल्दार ८६ वर्षीय बीर्ख गुरुङलाई सम्मान गरिएको थियो ।
प्रहरी उपरीक्षक अनिल राणाले रु दुई करोड ८३ लाख ३४ हजार छ सय ४१ को लगातमा अढाइ तले पक्की भवन निर्माण भएको बताए। विसंं २०३७ मा बनेको पुरानो र जीर्ण भएकाले नयाँ भवन बनाइएको उनको भनाइ छ । भवनको विसंं २०७५ चैत १९ गते प्रदेशका तत्कालीन आन्तरिक मामिला तथा कानुनमन्त्री हिक्मतकुमार कार्कीले शिलान्यास गरेका थिए। सुविधा सम्पन्न २२ कोठे पक्की भवनको निर्माणको ठेक्का याक्थुङहाङ एसएस पुस्कर जेभी निर्माण कम्पनीले लिएको थियो ।
विसं २०७६ वैशाख २ गते कम्पनीले विसंं २०७७ साल वैशाख १९ गते निर्माण सम्पन्न गर्ने गरी ठेक्का सम्झौता गरेको थियो । यद्यपि कोराना भाइरसका कारण तोकिएको समयमा भवन नबन्दा निर्माण कम्पनीले चौथोपटक म्याद थप गरेर भवन निर्माण सम्पन्न गरेको जनाइएको छ । भूकम्प प्रतिरोधात्मक भवनबाट सेवा सुरु भइसकेको जिल्ला प्रहरी कार्यालय झापाका प्रहरी उपरीक्षक विश्वमणि पोखरेलले बताए । उनका अनुसार कार्यालयको नाममा हाल डेढ बिघा जमिन रहेको छ ।
