काठमाडौँ, १२ पुस । नेपाल टी-२० लिग (एनपीएल) क्रिकेट प्रतियोगितामा लुम्बिनी अल स्टार्सले रोमाञ्चक जित निकालेको छ ।
अन्तिम बलमा छक्का प्रहार गर्दै लुम्बिनीले पोखरा एभेन्जर्समाथि तीन विकेटको रोमाञ्चक जित निकालेको हो ।
पोखराले दिएको एक सय ३४ रनको लक्ष्य लुम्बिनीले अन्तिम बलमा छक्का प्रहार गर्दै भेटायो । लुम्बिनीका लागि दक्षिण अफ्रिकाका अलराउन्डर श्याडली भान स्खलक्विकले अन्तिम बलमा छक्का प्रहार गर्दै ११ बलमा ३१ रन बनाए । यस्तै कुशल भुर्तेलले ३९ रन बनाए । बलिङतर्फ पोखराका विपीन खत्री र कुशल मल्लले दुई-दुई विकेट लिएका थिए ।
यसअघि टस हारेर ब्याटिङको निम्तो पाएको पोखराले निर्धारित २० ओभरमा नौ विकेट गुमाएर एक सय ३३ रन बनायो । पोखराका लागि कुशल मल्लले ६१ र श्रीलङ्काका उपुल थराङ्गाले ४२ रन बनाए । बलिङतर्फ दक्षिण अफ्रिकाका अलराउन्डर स्खलक्विकले तीन विकेट लिएका थिए ।
लुम्बिनी लगातार तेस्रो खेल जित्दै अङ्क तालिकाको शीर्ष स्थानमा छ भने लगातार तेस्रो खेल हारेको पोखरा तालिकाको पुछारमा छ ।
